SARKOZI ZGJEDH ISH-NDIHMËSIN E RIVALIT TË TIJ SI MINISTËR TË ÇËSHTJEVE EUROPIANE

Presidenti Nikolas Sarkozi ka zgjedhur një
ish-ndihmës të rivalit të tij të vjetër, Dominique de Villepin, si ministrin e tij të ardhshëm të Çështjeve Europiane si pjesë e asaj që ai e cilësoi një shenjë e çiltërsisë politike në kampin e tij konservator.
Sarkozi ka bindur disa figura të së majtës, kur ai krijoi kabinetin e tij 18 muaj më parë, përfshi ministrin e Jashtëm, Bernard Kouchner dhe ministrin aktual të Çështjeve Europiane, Jean-Pierre Jouyet.
Në një kohë kur Jouyet pritet të bëhet javën e ardhshme kreu i vëzhguesve të tregjeve financiare në Francë, Sarkozi deklaroi sot për gazetarët në një samit të liderëve të BE-së se ai do ta zëvendësojë atë me Bruno Le Maire, shefi i kabinetit të Villepinit, kur ai ishte kryeministër.
Villepin është në spektrin e djathtë politik, si Sarkozi, por dy liderët janë rivalë të betuar.
"Shpresoj që të gjithë të kuptojnë se sipas meje është gjithashtu mënyra për t'i thënë shumicës politike se cilido që dëshiron të japë kontributin e tij në reformat që po bëhen në Francë është i mirëpritur", deklaroi Sarkozi në një konferencë shtypi.
"Nuk mund të jem një njeri i hapur ndaj një pjese të së majtës dhe të mos i hapur në të njëjtën mënyrë ndaj të gjitha grupeve brenda familjes time politike. Askush nuk do ta kuptonte këtë", shtoi ai.