GJERMANIA PLANIFIKON SANKSIONE TË REJA NDAJ IRANIT

Gjermania po përgatit një paketë të re sanksionesh kundër Iranit, që presidenti i zgjedhur amerikan, Barack Obama mund ta përdorë për t'i bërë presion Republikës Islamike pasi të marrë postin në janar, njoftoi sot një revistë.
Revista "Der Spiegel" njoftoi se ministri i Jashtëm gjerman, Frank-Walter Steinmeier, donte  të binte dakord për paketën me fuqitë e tjera botërore për t'i dhënë Obamës mjetet e duhura për t'i bërë presion Iranit për të filluar dialogun lidhur me ambiciet e tij bërthamore.
Ministri i Jashtëm gjerman nuk pranoi të komentonte lidhur me këtë njoftim.
Një zyrtar i lartë në Ministrinë e Jashtme ia ka shfaqur tashmë këtë ide zyrtarëve francezë dhe britanikë, njofton "Spiegel". Plani parashikon që fuqitë botërore të bien dakord lidhur me sanksionet e reja, pa i zbatuar ato, për t'i dhënë Obamës mundësinë për të negociuar.
Obama ka deklaruar më parë se është gati t'i ofrojë Iranit iniciativa ekonomike për të ndaluar programin e tij bërthamor, por ai ka paralajmëruar gjithashtu Teheranin se mund të forcojë sanksionet, nëse ky i fundit i refuzon ato.