IZRAELI DHE HAMASI ANGAZHOHEN SE DO TË VAZHDOJNË LUFTIMET NË GAZA

Izraeli dhe Hamasi u angazhuan sot se do të vazhdonin luftimet, duke shpërfillur kërkesat ndërkombëtare për t'i  dhënë fund konfliktit në Gaza, i cili hyri në ditën 16-të me përleshje të ashpra mes trupave izraelite dhe militantëve palestinezë.
Lideri i Hamasit në mërgim Khaled Meshaal tha se grupi i tij islamik nuk do të merrte në konsideratë  një armëpushim derisa Izraeli t'i jepte fund ofensivës ushtarake dhe të hiqte blokadën ndaj Rripit të Gazës.
Izraeli i dërgoi tanket më në thellësi të enklavës bregdetare të kontrolluar nga Hamasi  dhe kërcënoi  se do të intensifikonte sulmet e saj ajrore dhe tokësore kundër militantëve, të cilët kanë lëshuar më shumë raketa ndaj shtetit hebre. Dëshmitarët palestinezë njoftuan për luftime të ashpra në lindje të qytetit  të Gazës kur  militantët e Hamasit lëshuan predha anti tank dhe mortaja kundër trupave izraelitë, që po avancojnë në brendësi të territorit, që u përgjigjën me predha tankesh dhe sulme ajrore. 
Në jug perëndim të qytetit, ushtarët izraelitë vranë 10 militantë, bënë të ditur zyrtarë  palestinezë të shëndetësisë.  Gjatë sulmeve ajrore  pesë militantë u vranë, thanë  mjekët. Të paktën një nga viktimat u identifkua si militant i Hamasit.