Greqi, aleatët bien dakort për masat, Trojka e kënaqur

Greqi, aleatët bien dakort për masat, Trojka e kënaqur Pas një takimi dramatik prej dy orësh, nën hijen e rrezikut të rënies së qeverisë, me pasoja të paparashikueshme, tre krerët e partive në koalicion, më në fund ranë dakord për t’i paraqitur Trojkës masat për kursimin e 11.5 miliardë euro, gjatë viteve 2013-2014.

Megjithë rezervat e forta që kanë shprehur më parë, kreu i PASOK dhe ai i DIMAR pranuan projektin e kryeministrit Samaras dhe Ministrit të Financave për paketën e masave, duke përfshirë edhe një shkurtim të ri drastik në paga dhe pensione. 

"Më duhet të pranoj. Ne nuk mund ta çojmë vendin në zgjedhje, siç bëri Demokracia e Re nëntorin e kaluar. Do t’i qëndrojmë programit të marrëveshjes", tha kreu i PASOK pas takimit. Venizelos theksoi se "është zgjedhje dhe përgjegjësi e kryeministrit, që masat për 11.5 miliardë euro të merren menjëherë”. 

Kryetari i së Majtës Demokratike, Fotis Kuvelis deklaroi se, "qëndrimi ynë i përbashkët është të rëndohen sa më pak shtresat e varfra".

"Vendimi krijon klimë besueshmërie ndërkombëtare për Greqinë. Si kryeministër unë kam detyrë dhe përgjegjësi. Nëse nuk e marrim tani këtë vendim, do të hymë në izolim dhe do të përballemi me dyer të mbyllura", mësohet t’iu jetë drejtuar kryeministri Samaras aleatëve të tij. 

Të paktën 6 miliardë do të sigurohen nga shkurtimi i pagave dhe pensioneve, duke shkaktuar edhe më shumë dhimbje e depresion në shoqërinë greke, e cila numëron tashmë më shumë se 1 100 000 persona të papunë.

Ministri i Financave, Stournaras theksoi se një objektivi kyç është "për të minimizuar ndikimin social të masave". Nga kjo paketë masash varet edhe disbursimi i këstit të ndihmës 31.5 mld euro për Greqinë. 

Trojka e kënaqur pas takimit me Stournaras
Rreth dy orë zgjati takimi Treshes me ministrin e Financave, Janis Stournaras, i cili informoi se është rënë dakort për shkurtimet dhe masat, me qëllim kursimin e 11.5 miliardë eurove. Pas takimit, përfaqësuesit e FMN, BQE dhe BE mbetën me sa duket të kënaqur. “Takim i shkëlqyer” tha Paul Thomsen, ndërsa kur Mathias Morse u pyet nëse bisedimet janë në rrugë të mbarë, u përgjigj: “Edhe pak ditë më shumë...”.
http://www.balkanweb.com/rajoni/2687/greqi-aleatet-bien-dakort-per-masat-trojka-e-kenaqur-98074.html
English Italiano Deutsch Russian Türk Greek