KOSOVË - DIPLOMATË TË AKREDITUAR NË PRISHTINË VLERËSOJNË PROGRESIN GJATË VITIT TË PARË TË PAVARËSISË

Presidenti i Republikës së Kosovës, Fatmir Sejdiu dhe kryeministri Hashim Thaçi pritën sot diplomatë të shteteve të Pesëshes, të akredituar në Prishtinë dhe Përfaqësuesin Civil Ndërkombëtar, Piter Feith, të cilët i shprehën popullit të Kosovës urimet më të sinqerta me rastin e njëvjetorit të pavarësisë.

Përfaqësuesi Civil Ndërkombëtar, Feith dhe ambasadorja e Shteteve të Bashkuara të Amerikës, Tina Kaidanov konfirmuan vazhdimin e mbështetjes ndërkombëtare për Kosovën. 

“Dua t’ju përgëzoj për progresin e arritur që prej shpalljes së pavarësisë dhe për përkushtimin në zbatimin me përpikëri të Planit Ahtisaari që keni zbatuar gjatë gjithë kohës. Ne jemi të përkushtuar ta vazhdojmë mbështetjen e fuqishme, në mënyrë që Kosova të ecë edhe më tej në rrugën e saj. Kosova do të jetë vend i lirë dhe demokratik, i të gjitha komuniteteve”, tha Feith.
Ambasadorja amerikane, Kaidanov tha se populli i Kosovës duhet të jetë krenar për punën e bërë deri tani dhe premtoi vazhdimin e mbështetjes amerikane.
Presidenti Sejdiu i falënderoi shtetet që kanë njohur Kosovën dhe rolin që kanë luajtur ato për një vit.
“Urimet tuaja janë inkurajim i madh për ne dhe qytetarët tanë. Kosova do të jetë shtet demokratik i të gjithë qytetarëve me një kujdes të veçantë ndaj komuniteteve pakicë”, tha  presidenti Sejdiu./
Në këtë takim morën pjesë edhe ambasadorët e Britanisë, Gjermanisë, Francës dhe Italisë