PAKISTAN - TALEBANËT SHPALLIN NJË ARMËPUSHIM PA AFAT NË SWAT

Talebanët njoftuan sot një armëpushim pa afat në luginën Swat pas marrëveshjes për sheriatin e arritur me autoritetet provinciale të këtij rajoni në veriperëndim të Pakistanit.
Ky armëpushim pa afat u njoftua në përfundim të një këshilli konsultativ të mbledhur nga maulana Fazlullah, komandanti i luftëtarëve talebanë të luginës Swat, njoftoi AFP-në Muslim Khan, zëdhënës i grupit të Fazlullahut.
"Shoora (këshilli konsultativ) u mblodh sot nën autoritetin e maulana Fazlullahut dhe vendosi lidhur me një armëpushim për një periudhë të pakufizuar", deklaroi ai.
Një armëpushim 10 ditor ishte arritur që më 16 shkurt pas një marrëveshjeje mes qeverisë së Pakistanit dhe liderëve islamikë që parashikonte zbatimin e sheriatit, ligji islamik, në luginën Swat.
Lugina e Himalajave Swat, qendra turistike dikur më e frekuentuara e Pakistanit, të paktën 120 kilometra në perëndim të kryeqytetit Islamabad, në vitin 2007 ra në duart e talebanëve pakistanezë.