SENATI AMERIKAN NIS NJË PROCEDURË PËR SHMANGIET JURIDIKE TË PRESIDENCËS BUSH

Komisioni i Çështjeve Juridike në Senatin amerikan do të shqyrtojë më 4 mars mjetet për ngritjen e një komisioni hetimor mbi shmangiet juridike të presidencës Bush, njoftoi sot kryetari i këtij komisioni, demokrati Patrick Leahy.
"Ne nuk duhet të kemi frikë për të kuptuar atë që kemi bërë, nëse duam të mbetemi një komb vigjilent për të mbrojtur si sigurinë kombëtare po ashtu edhe Kushtetutën tonë", deklaroi senatori Leahy në një fjalim në Senat. 
Më 9 janar, Leahy kishte kërkuar ngritjen e një komisioni të pavarur për të hetuar devijimet, e veçanërisht ato të brendshme, të administratës Bush në kuadrin e "luftës së tij kundër terrorizmit". 
"Asgjë nuk i ka shkaktuar më shumë dëm figurës dhe autoritetit moral të Amerikës sesa zbulimi se gjatë këtyre tetë vjetëve të fundit, ne kemi braktisur angazhimin tonë historik për të drejtat e njeriut duke tejkaluar ligjin", argumentoi Leahy.