BRENDA 2009-s, KROACIA DO TË LIBERALIZOJË VIZAT ME SHQIPËRINË

-Deklaron kryeministri kroat Sanader gjate takimit në Zagreb me kryeparlamentaren Topalli -  
Kryetarja e Kuvendit, Jozefina Topalli, e shoqëruar nga dy bashkëkryetarët e komisionit ad-hoc për NATO-n, Ferdinand Xhaferri dhe Pandeli Majko zhvilluan një vizitë në Kroaci, me ftesë të Kryetart të Parlamentit, Luka Bebiç.

Zyra e shtypit e Kuvendit njoftoi të mërkurën, se vizita e kryeparlamentares Topalli në Zagreb zhvillohet vetëm një muaj para Samitit të NATO-s, ku Kroacia dhe Shqipëria pritet të përjetojnë ngjarjen e madhe historike të anëtarësimit në Aleancën e Veriut.  
Gjatë vizitës së saj në Kroaci, kryetarja e Kuvendit u prit nga Kryeministri kroat, Ivo Sanader, i cili e konsideroi "një arritje historike dhe një moment kulmor për të dy vendet anëtarësimin në Aleancë në Samitin e ardhshëm. Besoj se ne do të kapërcejmë së shpejti problemet e momentit dhe do të festojmë së bashku 60-vjetorin e NATO-s dhe anëtarësimin tonë me të drejta të plota në këtë aleancë. Pas kësaj arritjeje, do të jetë dhe më e lehtë rruga drejt BE-së". 
"Delegacionet e Kroacisë dhe Shqipërisë do të jenë bashkë në Strasburg dhe Kehl, -tha Kryetarja e Kuvendit- e cila theksoi se, bashkëpunimi ynë pas kësaj ngjarje të jashtëzakonshme do të kalojë në një stad të ri dhe ndihemi shumë mirë që do të jemi partnerë në sfidat e reja të sigurisë rajonale, por dhe globale". 
Biseda mes dy zyrtarëve të lartë ishte konkrete dhe me piketa të qarta, veçanërisht përsa i takon bashkëpunimit ekonomik, duke u fokusuar sidomos në sektorin e energjisë.

Lidhur me çështjen e regjimit të vizave Kryeministri Sanader konfirmoi se "Kroacia do të liberalizojë lëvizjen pa viza me Shqipërinë brenda këtij viti. Kjo do të sillte jo vetëm lëvizjen e lirë të qytetarëve, por edhe intensifikimin e bashkëpunimit në fushën e turizmit, shkëmbimeve tregtare, etj."  "Është ky objektiv i yni politik dhe ne do ta realizojmë", theksoi ai.

Çështjet e bashkëpunimit dhe bashkërendimit të politikës së jashtme mes Kroacisë dhe Shqipërisë ishin në fokus të takimit që Kryetarja e Kuvendit dhe delegacioni që e shoqëronte zhvilloi me Ministrin kroat të Punëve të Jashtme, Gordan Jandrokoviç