KAKAVIJË: KONTRABANDA E MALLRAVE, NDALOHET DOGANIERI DHE TREGTARI

Një punonjës i doganës së Kakavijës në Gjirokastër u arrestua në orët e vona të ditës së djeshme, pasi akuzohet të këtë ndihmuar një tregtar të televizorëve në kontrabandën e mallrave. Në prangat e policisës se sektorit kundër krimit financiar në drejtorinë e policisë së Gjirokastrës ka rënë dhe tregtari, i cili në momentin e ndalimit në aksin rrugor Gjirokastër- Tepelenë u prezantua si oficer i policisë së krimit ekonomik në Tiranë.
Tregtari Pëllumb Kaziu, 39 vjeç, lindur dhe banues në Tiranë, i dënuar më parë për vjedhje me armë dhe Agron Basha, 43 vjeç, lindur dhe banues në Lazarat (Gjirokastër), me detyrë doganier në Kakavijë, akuzohen për veprën penale kontrabandë me mallra të tjerë, përvetësim i detyrës shtetërore dhe shpërdorim detyre”, thanë për ATSH-në burime zyrtare të policisë lokale.
Mbrëmjen e kaluar tregtari Kaziu ka hyrë nga Greqia në pikën e Kakavijës me automjetin tip “Mitsubishi”, me targë TR 37 37 P, me të cilin transportonte 16 televizorë Plazma, 6 prej të cilëve ishin 32 polsh dhe 10 të tjerët 40 polsh. Për këtë mall ai nuk kishte paguar asnjë detyrim në doganën shqiptare të Kakavijës dhe nga veprimet hetimore rezulton se në detyrë për kontrollin fizik ka qenë doganieri Agron Basha.
Në momentin e ndalimit tregtari u prezantua si oficer i policisë së krimit ekonomik në Tiranë dhe në automjetin e tij u gjet një fenelinë me ngjyrë blu, e ndezur mbi kabinë, dhe një tabelë e policisë rrugore”, shtuan burimet e policisë.