KRYEPROKURORJA RAMA: ÇËSHTJA "GËRDECI, SHUMË SHPEJT NË GJYKATË

Materialet hetimore për çështjen "Gërdeci" shumë shpejt do të dërgohen  për shqyrtim në Gjykatën e Lartë. 
"Prokuroria është duke kryer procedurat e fundit hetimore për këtë çështje", tha sot Prokurorja e Përgjithshme, Ina Rama, në një prononcim për mediat, pas një takimi në Tiranë me përfaqësues të EURALIUS, Misionit Europian të Asistencës për Sistemin Shqiptar të Drejtësisë. 
Sipas burimeve nga Prokuroria, në përgjegjësi penale për këtë çështje janë marrë 28 persona, pjesa me e madhe  ish -funksionarë të ministrisë së Mbrojtjes dhe Shtabit të Përgjithshëm të Forcave të Armatosura, të cilët akuzohen për "shpërdorim detyre" në bashkëpunim. 
Mësohet se të pandehurit në këtë proces kanë firmosur për mbylljen e hetimit, ndërsa kanë mbajtur qëndrim mohues për akuzat e ngritura ndaj tyre.    
Hetimet për këtë çështje nisën më 15 mars të 2008, kur si pasojë e një shpërthimi në ish- fabrikën e demontimit të municioneve luftarake në fshatin Gërdec, rreth 20 km larg Tiranës, humbën jetën 26 persona, shumë të tjerë u plagosën ndërsa u shkaktuan dëme të mëdha materiale