ÇËSHTJA "GËRDECI" NË GJYKATË ME 29 TË AKUZUAR

Pas një viti hetimesh, Prokuroria e Përgjithshme dërgoi  sot çështjen "Gërdeci"  për shqyrtim në Gjykatën e  Lartë, me 29 persona të marrë nën përgjegjësi penale.  
Lajmi është konfirmuar për ATSH nga burime zyrtare të Prokurorisë së Përgjithshme, të cilat pohuan se,  me përfundimin e hetimit,  materiali hetimor i çështjes është dërguar për shqyrtim gjyqësor,  me 29 persona të marrë me cilësinë e të pandehurit nga Prokuroria si dhe është vënë nën akuzë si subjekt juridik firma "Alba -Demil".   Prokuroria e Përgjithshme konfirmoi po ashtu se,  hetimi i  çështjes përfundoi brenda afateve hetimore. 
Pjesa më e madhe e të pandehurve janë  ish -funksionarë të ministrisë së Mbrojtjes dhe Shtabit të Përgjithshëm të Forcave të Armatosura, ndër të cilët edhe ish- ministri i Mbrojtjes Fatmir Mediu,   të  akuzuar për "shpërdorim detyre" në bashkëpunim.   
Nga 29 të akuzuarit e çështjes,  vetëm 4 prej tyre janë arrestuar dhe aktualisht ndodhen në paraburgimin e Tiranës, të akuzuar ndër të tjera për vrasje të më shumë se  një personi.  Të tjerët janë hetuar në liri nga prokuroria.
Pak ditë më parë të  gjithë të pandehurit e procesit  firmosën  mbylljen e hetimit, ndërkohë që,  mësohet se kanë mbajtur qëndrim mohues për akuzat e ngritura ndaj tyre nga Prokuroria.    
Hetimet për këtë çështje nisën më 15 mars të 2008, kur,  si pasojë e një shpërthimi në ish- fabrikën e demontimit të municioneve luftarake në fshatin Gërdec, rreth 20 km larg Tiranës, humbën jetën 26 persona, shumë të tjerë u plagosën, ndërsa u shkaktuan dëme të mëdha materiale