BERISHA-ZAPATERO: KRYEMINISTRI I SPANJËS SHPREH PËRKRAHJEN E QEVERISË SË TIJ PËR INTEGRIMIN E SHQIPËRISË NË BE

Kryeministri Berisha pati sot, në Strasburg, një takim shumë të përzemërt me Kryeministrin e Spanjës José Luis Rodríguez Zapatero, bëri të ditur zyra e shtypit e Kryeministrisë. 
Kryeministri Berisha e falënderoi Kryeministrin e Spanjës për mbështetjen e dhënë nga qeveria e tij për anëtarësimin e Shqipërisë në NATO. 
Nga ana e tij, Kryeministri i Spanjës Zapatero, pasi e uroi Kryeministrin Berisha për anëtarësimin e Shqipërisë në NATO, shprehu përkrahjen e qeverisë së tij edhe për procesin e integrimit të vendit tonë në Bashkimin Europian.
Gjithashtu, Kryeministri Zapatero vlerësoi reformat e gjithanshme të ndërmarra nga qeveria shqiptare, si dhe faktin që marrëdhëniet mes dy vendeve kanë bërë një hov cilësor gjatë viteve të fundit.
Të dy personalitetet e larta diskutuan edhe për çështje të integrimit të Shqipërisë në Bashkimin Europian, si dhe u ndalën edhe në çështjen e Kosovës.
Kryeministri Berisha dhe Kryeministri Zapatero shprehen gatishmërinë për të thelluar dhe forcuar më tej marrëdhëniet shumë të mira që ekzistojnë mes dy qeverive dhe vendeve respektive, si dhe për të zgjeruar bashkëpunimin në fushën ekonomike dhe në fusha të tjera me interes reciprok