MAQEDONIA VOTON DUKE SHPRESUAR TË FITOJË BESIMIN E BE-së DHE NATO-s

Maqedonasit votuan sot paqësisht, me vetëm disa parregullsi të vogla, në raundin e dytë të zgjedhjeve presidenciale, një proces që ata shpresojnë se do të provojë se tashmë janë mjaft të pjekur për t'u anëtarësuar në Bashkimin Evropian dhe NATO.
Komuniteti ndërkombëtar kishte paralajmëruar më parë Maqedoninë, se nëse këto zgjedhje nuk do të përmbushnin standartet ndërkombëtare, atëherë e ardhmja euro-atlantike e vendit rrezikohej seriozisht.
"I gjithë procesi duket se po shkon mirë deri më tani", tha Erwan Fouere, ambasadori i BE në Maqedoni.
"Zhvillimi normal i këtyre zgjedhjeve konfirmon kredencialet demokratike të këtij vendi. Për të shkuar drejt Bashkimit Europian dhe NATO-s, këtij vendi i duhen pikërisht këto kredenciale demokratike, ja sepse këto zgjedhje janë kaq të rëndësishme", theksoi Jose Luis Herrero, kreu i prezencës së Organizatës për Siguri dhe Bashkëpunim në Evropë (OSBE) në Maqedoni. 
Procesi i votimit nuk është shoqëruar me raste dhune apo parregullsi të tjera, sipas vëzhguesve lokalë dhe të huaj të zgjedhjeve.
Maqedonia aplikoi për t'u anëtarësuar në BE në vitin 2005, por që prej atëherë procesi nuk ka avancuar dhe ndërkohë Greqia ka bllokuar edhe procesin e hyrjes së saj në NATO për shkak të një mosmarrëveshjeje 17-vjeçare lidhur me emrin zyrtar të vendit.
Në raundin e dytë të zgjedhjeve për postin ceremonial të presidentit të vendit garuan Gjorge Ivanov, 49 vjeç, i cili nuk ka kandiduar për këtë post më parë, dhe Ljubomir Frckovski i partisë më të madhe të opozitës SDSM. Sondazhet tregojnë një kryesim të Ivanov, i cili mbështetet nga partia në pushtet VMRO-DPMN