OBAMA MBËRRIN NË TURQI PËR VIZITËN E PARË NË NJË VEND MYSLIMAN

Presidenti amerikan Barack Obama mbërriti sot në Turqi për vizitën e tij të parë në një vend mysliman, që synon të konsolidojë marrëdhëniet midis dy vendeve aleate.
Vizita e Obamës në Turqi, destinacioni i fundit i turit të tij tetëditor që shënon debutimin e tij të parë në arenën botërore si president i SHBA-së, përfaqëson njohjen e kapaciteteve të mëdha të vendit laik me popullsi myslimane dhe synimet e Uashingtonit për angazhimin e Ankarasë në zgjidhjen e mosmarrëveshjeve dhe konflikteve me Iranin dhe sigurimin e kontributit të saj për vendosjen e sigurisë në Afganistan.
Marrëdhëniet turko-amerikane u përkeqësuan në vitin 2003, kur Ankaraja kundërshtoi ashpër pushtimin e Irakut. Por, Obama do të kërkojë ndihmën e Turqisë në mbështetje të stategjisë së tij të re për Afganistanin, ndërkohë që planifikon reduktimin dhe tërheqjen e trupave ushtarake nga Iraku.