ITALI - TËRMETI SHKATËRRON EDHE MONUMENTE HISTORIKE

Shumë monumente historike u shkatërruan nga një tërmet i fortë që goditi sot qendrën e Italisë, në mënyrë të veçantë kishat e Akuilës, kryeqytetin e Abrucos, qyteti mesjetar i arkitekturës baroke ku ndodhej edhe epiqendra e tërmetit. 
Lokaliteti i krijuar në shekullin e XIII, 100 kilometra në verilindje të Romës, është një nga qendrat më të mëdha urbanistike të mesjetës në Itali. 
 ''Kisha e saj më e bukur, bazilika ''Santa Maria di Collemaggio'', që i përket shekullit të XIII dhe kishat ''Santo Agostino'' dhe ''Suffragio', që të dyja të shekullit të XVIII janë shkatërruar pjesërisht, gjithashtu është dëmtuar edhe këmbanorja e kishës San Bernardino që i përket shekullit të XV, fasada e së cilës i ka rezistuar tërmeteve që kanë prekur herë pas here qytetin'', deklaroi Ministria e Kulturës në një komunikatë.
Kështjella madhështore që i përket shekullit të XV që u ndërtua në epokën e dominimit spanjoll dhe ku u vendos muzeu kombëtar pësoi dëme të vogla dhe u mbyll për publikun në pritje të verifikimeve të mëvonshme që do të bëhen nga shërbimet e shpëtimit, të vendosura aktualisht për t'i ardhur në ndihmë popullatës.
 ''Në Romë, ''Thermes de Caracalla'', një kompleks që daton në shekullin e III të erës tonë ka pësuar shumë dëme materiale'', theksoi Angelo Bottini, zyrtar i sektorit të arkeologjisë në kryeqytet.
Bottini theksoi se ''vende të tjera historike të qytetit, në mënyrë të veçantë Forumi dhe Koloseumi nuk kishin pësuar dëme''