RAUL KASTRO I GATSHËM TË DIALOGOJË ME SHBA-në, POR NË POZITA TË BARABARTA

Presidenti kuban, Raul Castro "përsëriti gatishmërinë e Kubës për të dialoguar për të gjitha temat" me Uashingtonin, por si të barabartë, gjatë një takimi sot në Havanë me paralamentarë amerikanë, njoftohej sot në një komunikatë zyrtare kubane. 
"Gjatë këtij shkëmbimi të gjerë janë trajtuar tema të ndryshme, duke pasur në shënjestër evoluimin e mundshëm të ardhshëm të marrëdhënieve dypalëshe dhe lidhjet ekonomike pas ardhjes në pushtet të administratës së re amerikane të Barak Obamës", thuhej në komunikatë. 
Raul Castro përsëriti "qëndrimin kuban të shprehur gjatë fjalimeve të ndryshme publike dhe që korrespondojnë me parimet e ruajtura në mënyrë të pandryshueshme nga vendi ynë", që pas Revolucionit të 1959-s që solli në pushtet vëllanë e tij Fidelin, vijon teksti. 
Është fjala "për gatishmërinë për të dialoguar për të gjitha temat, duke pasur si kusht të vetëm barazinë sovrane të shteteve, respektin absolut të pavarësisë kombëtare dhe të drejtën e patjetërsueshme të çdo populli për vetëvendosje", sipas të njëjtit burim. 
Një grup prej shtatë demokratësh të Dhomës amerikane të Përfaqësuesve po kryen që prej të premtes një vizitë në Kubë me shpresën për të zbutur qëndrimin me këtë shtet komunist që është nën embargon amerikane që prej vitit 1962.