KAPSHTICË: PASHKËT ORTODOKSE, NIS ARDHJA E EMIGRANTËVE

 Fillon ardhja e emigrantëve shqiptarë, që punojnë e jetojnë në Greqi, për festën e Pashkës Ortodokse (19 prill). Burime të policisë kufitare të Kapshticës, në rrethin e Devollit, thanë për ATSH se gjatë ditës së sotme (e dielë ) janë regjistruar në sportelet e këtij vendkalimi  të paktën 4300 shtetas, të ardhur nga vendi fqinjë, Greqia.
Nga ana e policisë kufitare janë marrë masa për të përballuar fluksin në të dyja anët e kufirit dhe për të menaxhuar situatën në rast të shtimit të numrit të emigrantëve pranë sporteleve. Komandanti i policisë kufitare të Kapshticës, Dritan Sheme, theksoi se "me ardhjen e emigrantëve nga shteti grek po punohet aktualisht me tre sportele në hyrje dhe dy të tjera në dalje. Por, me rritjen e fluksit të lëvizjeve, numri i sporteleve do të shkojë në 7 të tilla dhe do të ketë shtim të personelit për të disiplinuar lëvizjet ndërkufitare". 
Gjatë dy ditëve të fundit vetëm nga ky vendkalim kufitar kanë hyrë në vend 9300 emigrantë, ndërkohë që sipas komandantit Dritan Sheme, në dalje të vendit në drejtim të shtetit grek janë regjistruar të paktën 2000 shtetas. Policia kufitare është angazhuar me një plan masash për të lehtësuar kalimin në kufi të emigrantëve që po vijnë në vend për të festuar Pashkët ortodokse.