VLORË: AMBASADORI JENSEN: "SHQIPËRIA JO VETËM ANËTARE, POR NJË VLERË E SHTUAR E BE-së"

Ambasadori i Mbretërisësë së Danimarkës në Tiranë,  Karsten Ankjaer Jensen, konfirmoi sot në qytetin e Vlorës, angazhimin e BE-së për të mbështetur anëtarësimin e Shqipërisë si dhe vlerësoi hapat e bëra në këtë drejtim.
“Shqipëria, do të jetë jo vetëm anëtare, por edhe një vlerë e shtuar e Bashkimit Evropian”, u shpreh Ambasadori Jensen gjatë një leksioni, që zhvilloi me studentët dhe pedagogët e Universitetit “Ismail Qemali” në Vlorë.
Sipas tij: Bashkimi Europian dhe vendet anëtare të tij, janë të angazhuara për të mbështetur Shqipërinë që të ecë në rrugën e integrimit dhe anëtarësimit. "Besoj fort tek e ardhmja e Shqipërisë. Jam i sigurt, që Shqipëria, do të bëhet anëtare e BE-së dhe shqiptarët do të mund të lëvizin lirisht brenda saj”, nënvizoi ambasadori i Mbretërisë së Danimarkës në Tiranë. 
Jensen u ndal në disa nga drejtimet kryesore dhe në standardet që duhet të përmbushë Shqipëria në këtë drejtim, ndërsa vlerësoi luftën e bërë kundër korrupsionit, duke e ilustruar atë me faktin se gjatë viteve të fundit, Shqipëria ka bërë hapa përpara, duke u ngjitur dukshëm në klasifikimin përkatës të vendeve që kanë rezultate. 
Zoti Jensen, veçoi luftën kundër korrupsionit dhe zbatimin e ligjit, si dy faktorët kryesorë, që përcaktojnë ecurinë në rrugën e integrimit dhe përmbushjes së standardeve, ndërsa u shpreh se, pjesë e tyre, është edhe kapaciteti administrativ. 
Sipas tij, vetëm në kuadrin e procesit të negociimit për anëtarësim në BE, Shqipërisë, do t’i nevojiten rreth 1000 punonjës civilë e specialistë që do të angazhohen në të.
Ambasadori i Mbretërisë së Danimarkës, në Tiranë, Jensen u ndal dhe në punën e mëtejshme në rrugën e vazhdimit të reformave. Brenda këtij konteksti, ai citoi se, procesi i integrimit varet nga ajo që duhet të bëjnë vetë shqiptarët, të cilët, sipas tij, duhet të vendosin nëse duhet të jenë pjesë e BE-së. 
Ky leksion, u organizua nga Zyra e Kërkimit Shkencor në Universitetin e Vlorës, në bashkëpunim me Lëvizjen Europiane në Shqipëri (EMA), në kuadër të projektit “Forcimi i Rrjetit të Qendrave të Informacionit të Bashkimit Europian në Qytetet Universitare të Shqipërisë”, mbështetur nga Delegacioni i Komisionit Europian në Shqipëri, për të drejtat e njeriut, nën dritën e aderimit të ardhshëm të Shqipërisë në BE.
Ambasadori Jensen ka një karrierë të gjatë në shërbimin diplomatik danez. Ai ka shërbyer si Ministër dhe Zv. Shef i Misionit të Ambasadës Daneze në Uashington, si Zv. Sekretar i Konventës Kuadër të Këshillit të Europës për Mbrojtjen e të Drejtave të Minoriteteve Kombëtare, në Kopenhagen dhe si Sekretar i Parë i Misionit Danez në NATO(Bruksel). Prej muajit shtator të vitit 2008, ai është Ambasador i Mbretërisë së Danimarkës në Shqipëri. Aktiviteti i sotëm, në Universitetin e Vlorës, pason atë të dy javëve më parë, kur, Ambasadorja e Cekisë në Tiranë, znj.Marketa Fialkova, gjatë një bashkëbisedimi me studentë dhe pedagogë, deklaroi se, aplikimi i Shqipërisë për statusin e vendit kandidat për në BE, do të bëhet brenda presidencës çeke.