Bollano dënohet me 6 muaj burg, 5 milion lek gjobë dhe perjashtim nga funksionet

Gjykata e Shkallës së Parë në Vlorë e ka shpallur fajtor Kryetarin e Bashkisë së Himarës për veprën penale të shpërdormit të detyrës.
I akuzuar se hoqi tabelat shqip në rrugën Qeparo-Llogara, gjyqtari Shkëlzen Selimi lexoi vendimin në të cilin veprimi i Bollanos konsiderohet i rëndë. Gjykata e dënoi Bollanon me 6 muaj burg, 5 milionë lekë te vjetra gjobë si dhe i hoqi për 3 vjet të drejtën e funksioneve publike.
Sipas vendimit të Gjykatës për 3 vjet, Bollano nuk mund të ushtrojë asnjë funksion administrativ që deri më tani ja ka lejuar funksioni i tij si Kryebashkiak i Himarës. Sic ka munguar gjate gjithe seancave, edhe ne seancen perfundimtare Bollano nuk ishte i pranishem. Ne seancen vendimtare mungoi edhe avokati i tij, Petraq Suri.
Shkak për hetimin dhe më pas gjykimin në Gjykatën e rrethit të Vlorës është bërë një urdhër, që është lëshuar prej kryetarit të Bashkisë, Vasil Bollano në muajin tetor të vitit 2007 për heqjen e tabelave në gjuhën shqipe në aksin rrugor Qeparo-Llogara, gjë që, sipas Prokurorisë, ka sjellë një dëm prej rreth 2.1 milionë lekësh.
Këto tabela ishin vendosur në kuadrin e një projekti për zhvillimin e turizmit i shtrirë përgjatë gjithë bregdetit nga Vlora në Sarandë, i financuar nga Ministria e Transportit, Punëve Publike dhe Telekomunikacionit dhe Ministria e Turizmit, Kulturës, Rinisë e Sporteve.
Përmes këtyre tabelave evidentoheshin objektet me vlerë historike, arkeologjike e turistike të zonës, mes të cilave plazhi i Dhërmiut, kalaja e Himarës, kalaja e Porto Palermos etj.
Gjatë fazës së hetimit, Bollano ka pranuar se ka dhënë një urdhër për heqjen e tabelave në gjuhën shqipe.