SPANJË - RASTI I PARË I GRIPIT TË DERRAVE TEK NJERIU NË EVROPË

Ministrja spanjolle e Shëndetësisë, Trinidad Jimenez deklaroi sot se një rast i gripit të derrave ishte zbuluar në Spanjë tek një burrë që kishte qendruar në Meksikë dhe se ky ishte rasti i parë i zbuluar në Evropë. 
"Është konfirmuar se analizat e pacientit nga Almensa (juglindje e Spanjës) për gripin e derrave ishin pozitive", deklaroi ministrja gjatë një konference shtypi. 
Është fjala për rastin e parë të konfirmuar të gripit të derrave në Evropë, ndërsa numri i të dyshuarve në Spanjë u rrit sot në mëngjes për të shkuar në 20 të tillë. 
"Nuk ka pasur asnjë rast në Evropë deri tani, i vetmi rast është ai i regjistruar në Spanjë", deklaroi ministrja spanjolle gjatë një konference shtypi në Madrid. 
Viktima e gripit është një i ri 23-vjeçar që është kthyer nga një udhëtim në Meksikë më 22 prill, që u shtrua të shtunën në mbrëmje, deklaroi më parë një zëdhënëse e shërbimeve të rajonit Castille-la-Manche. /m.