KOMENT - MIRËSERDHE SHQIPËRI!

 - "Financial Times" -

 Të goditur nga kriza ekonomike, argumentet kushtetuese dhe shqetësimet për raportet me Rusinë, do të bënin për udhëheqësit e Bashkimit Evropian që ndoshta të injoronin aplikimin e Shqipërisë së vogël për anëtarësim. E lehtë, por e gabuar. 
Zgjerimi i bllokut evropian drejt lindjes është një prej sukseseve të tij më të mëdha dhe ky proces duhet forcuar duke mbështetur shtetet e brishta në Ballkanin Perëndimor, përfshirë këtu edhe Shqipërinë. 
Turqia dhe Kroacia, dy vendet të cilat tashmë kanë hyrë në bisedimet për anëtarësim, kanë hasur në vështirësi. 
Në rastin e Turqisë, ekziston një mungesë thelbësore e gatishmërisë politike të Bashkimit Evropian, e cila ka nxitur zhgënjime në Ankara. Në rastin e Kroacisë, problemi kryesor qëndron tek konflikti kufitar që ka me Slloveninë, për të cilin Lubjana është duke bllokuar procesin e Zagrebit. 
Katër vendet e tjera të Ballkanit Perëndimor - Serbia, Bosnja, Maqedonia dhe Kosova - përballen me shumë sfida para se të mund të hyjnë në bisedime për anëtarësim. Serbia duhet të arrestojë fillimisht Ratko Mlladiçin, të akuzuarin për gjenocid; Bosnja duhet të dëshmojë unitet më të madh midis komuniteteve të ndara etnike; Maqedonia duhet të zgjidhë konfliktin rreth emrit me Greqinë dhe Kosova duhet të fitojë më shumë njohje ndërkombëtare të pavarësisë së saj. 
Dhe të gjitha këto vende, përfshirë këtu edhe Shqipërinë, duhet të bëjnë shumë më shumë në luftën kundër krimit dhe korrupsionit. E gjithë kjo nuk do të jetë e lehtë, por do të ishte edhe më e rëndë nëse s’do të ishin projektet për anëtarësim në Bashkimin Evropian. 
Dhe, ndërkohë, Bashkimi Evropian duhet të gjenerojë një mbështetje më të fuqishme për zgjerimin në Ballkan. Që prej luftërave jugosllave, Ballkani Perëndimor ka qenë më shumë përgjegjësi e Bashkimit Evropian. Përgatitja e Ballkanit Perëndimor për anëtarësim është rruga më e arsyeshme për përfundimin e misionit të sigurimit të paqes dhe zhvillimit të këtij rajoni.
Ndërkohë, Bashkimi Evropian duhet të rregullojë familjen e tij. Traktati i Lisbonës duhet të fitojë aprovim në referendumin e përsëritur irlandez këtë vit. Në rast të kundërt, nuk do të kishte hapësira ligjore për anëtarë të rinj, përjashtuar Kroacinë. BE-ja duhet të fitojë gjithashtu një mbështetje më të gjerë publike për zgjerimin me vendet e Ballkanit. Zgjerimi i mëtejshëm duhet të argumentohet si pjesë e zgjerimit modest të periudhës 2004-07, duke pranuar shtete pothuajse të rrethuara nga shtetet anëtare.
Kjo do të ishte e vështirë në një kohë krize ekonomike. Por, nuk duhet të jetë e pamundur.