GJERMANI - DHJETËRA POLICË PLAGOSEN NË PËRLESHJET ME MANIFESTUESIT NË DITËN E PUNËTORËVE

Manifestimet sot në festën e 1 Majit, Dita Ndërkombëtare e Punëtorëve, degjeneruan në akte spontane dhune në Berlin dhe Hamburg duke shkaktuar plagosjen e dhjetëra policëve, bënë të ditur burime zyrtare.
Policia berlineze njoftoi se 29 efektivë të forcave të rendit u lënduan dhe të paktën 12 manifestues u arrestuan, pasi afro 200 protestues me slogane antikapitaliste sulmuan policinë me shishe, gurë dhe mjete të tjera të forta pas një feste në rrugë në distriktin lindor Friedrichshain.
Protestuesit u vunë zjarrin disa kazanëve të mbeturinave dhe sulmuan me mjete të forta tramvajet dhe disa makina të parkuara, njoftoi policia e Berlinit.
Ndërkohë në Hamburg, autoritetet deklaruan se të paktën tre policë janë lënduar gjatë përleshjeve me demonstruesit.
Policia berlineze po përgatitet për përballimin e situatave më të dhunshme gjatë marshimeve sot të anëtarëve të partive të ekstremit të djathtë, të sindikatave të punëtorëve dhe grupe të majta.
Kriza ekonomike globale pritet të nxisë një pjesëmarrje shumë të madhe në manifestimet me rastin e Ditës Ndërkombëtare të Punëtorëve, që tradicionalisht përkujtohet me protesta të sindikatave të punëtorëve në shumë qytete evropiane.
Kështu, tetë grupimet më të mëdha sindikaliste të Francës kanë bërë thirrje për një protestë masive mbarëkombëtare kundër masave të presidentit Nicolas Sarkozy për përballimin e krizës ekonomike dhe ndërkohë një demonstratë shumë e madhe pritet të zhvillohet gjithashtu në Madrit, Spanjë.