NUMRI I ULËT I VDEKJEVE NGA GRIPI I DERRAVE NË MEKSIKË NGAZËLLEN BOTËN

Në një lajm të mirë për një botë të tronditur nga kërcënimi i një pandemie gripi, testet e reja laboratorike treguan se numri i të vdekurve nga gripi i derrave në Meksikë është më i vogël nga ai i menduar disa ditë më parë.
Meksika uli numrin e vdekjeve të shkaktuara nga gripi i derrave H1N1 në 101 nga 176, ndërkohë që dhjetëra teste të tjera kanë rezultuar negative. 
Qendra Amerikane për Kontrollin dhe Parandalimin e Sëmundjeve (USCDCP) ra dakord për faktin se shpërthimi i sëmundjes mund të mos jetë aq serioz sa u paraqit disa ditë më parë.
Ndërkohë, për meksikanët, të cilët po kalojnë fundjavën e dytë të mbyllur në shtëpitë e tyre, të dhënat e fundit përbëjnë për ta një gëzim të madh.
Ministri meksikan i Shëndetësisë, Jose Angel Cordova tha se numri ishte inkurajues, por tërhoqi vëmendjen duke theksuar se ishte shumë shpejt të thoje se Meksika kishte marrën nën kontroll gripin e derrave, që deri tani ka infektuar shumë persona në 15 vende të botës.
"Deri tani është e paparashikueshme, pasi ne nuk e kemi këtë informacion'', deklaroi dje Cordova duke shtuar se rastet epidemike mund të arrijnë përsëri pika kulmore.
"Kemi nevojë për më shumë kohë për të parë zhvillimin e kësaj epidemie si edhe për të vëzhguar zvogëlimin e saj për të thënë më në fund se ajo po shkon drejt zhdukjes'', theksoi ai.
Virusi i ri është shkaku i sëmundjes së tretë që paraqet mundësi për pandemi, gjatë 10 viteve të fundit, pas SARS-it dhe gripit të shpendëve.
Ky virus ka provokuar një aktivitet të jashtëzakonshëm të ekspertëve të shëndetësisë për prodhimin e një vaksine si edhe ka shkaktuar një krizë të madhe në industrinë e udhëtimeve duke sjellë anulimin e qindra fluturimeve drejt dhe nga Meksika.