Kryetari detyrohet të japë dorëheqjen

Michael Martin ka njoftuar se do të largohet nga posti muajin e ardhshëm.

Z. Martin është përballur me kritika dhe pakënaqësi pas publikimit të informatave rreth shpenzimeve të tepruara që i kanë faturuar shtetit deputët e parlamentit.

Pavarësisht nga tradita britanike sipas së cilës deputetët nuk e kritikojnë kryetarin, një numër deputetësh në rritje e ka akuzuar atë se po pengon reformimin e sistemit të shpenzimeve.

Mbi të rëndojnë dhe kritika se nuk arriti ta kuptonte indinjatën e publikut në këtë çështje.

Të hënën, z. Martin kërkoi falje para parlamentit për rolin që ka luajtur në këtë krizë.

Dorëheqje 'e pashmangshme'

Naomi Grimley, korrespondente e BBC-së për çështjet e politikës britanike, thotë se me njoftimin e dorëheqjes, z. Martin është dorëzuar para së pashmangshmes.

Ajo shton se pozita e kryetarit të parlamentit u bë e pasigurt sidomos
pas një përplasje të dëmshme me kolegët në parlament të hënën.

Shumë deputetë mendojnë se ai duhet të marrë pjesën kryesore të fajit për sistemin e shpenzimeve të tepruara parlamentare, i cili e ka indinjuar pa masë opinionin publik britanik.

Gazetat kombëtare iu bashkuan korit të zërave që i kërkuan z. Martin të jepte dorëheqjen në mënyrë që t'i hapej rruga një figure të re, e cila do zë inkurajonte një proces reformash në këtë fushë.