PËRMBLEDHJE - E DJATHTA TRIUMFON NË EVROPË, PJESËMARRJE E ULËT NË VOTIME

Partitë e qendrës së djathtë ruajtën kontrollin e tyre në Parlamentin Evropian në zgjedhjet maratonë që përfunduan dje me një pjesëmarrje shumë të ulët, por që kurseu qeveritë e vendeve më të mëdha evropiane nga disfata.
Rezultatet e pjesëshme tregonin që grupi i Partisë Popullore Evropiane ka triumfuar përballë së majtës dhe do të vijojë të jetë grupimi më i madh parlamentar, duke konsoliduar pozitat e së djathtës për të diktuar axhendën e Asamblesë, që miraton pjesën më të madhe të ligjeve dhe buxhetin e Bashkimit Evropian.
Grupimet e djathta në pushtet në Gjermani, Francë, Poloni dhe Itali, dhe partitë e Gjelbërta fituan përballë Socialistëve, që nuk mundën të shfrytëzonin pakënaqësinë e gjerë ndaj menaxhimit të krizës globale ekonomike nga Evropa.
Pjesëmarrja ishte në nivele të ulëta rekord prej 43 për qind. Sondazhet paraprake dhe rezultatet e para zyrtare treguan se partitë në pushtet kishin pësuar humbje në disa nga vendet të goditura më rëndë nga kriza ekonomike, si Britani e Madhe, Irlandë, Letoni, Greqi, Hungari, Bullgari dhe Spanjë.
Por liderët e BE-së mund të ndjehen tani më të lehtësuar, pasi partitë e ekstremit të djathtë nuk arritën të fitonin më shumë, pavarësisht suksesit të tyre në disa vende si Hungaria, dhe mirëpritën stabilitetin e Parlamentit me 736 vende, që do t'i duhet të fillojë punën me shqyrtimin dhe miratimin e rregullave të reja financiare.
"Nuk pres ndonjë problem serioz për sa i takon vendimarrjes. Përbërja e Parlamentit të ri nuk do të jetë shumë më e ndryshme nga ai i mëparshmi", deklaroi komisioneri evropian për Çështjet Ekonomike dhe Monetare, Joaquin Almunia.
Fitorja e forcave të qendrës së djathtë pas katër ditësh votimesh pritet të ndihmojë Hose Manuel Barroson, politikan konservator, të sigurojë një mandat të ri si president i Komisionit Evropian, një post që kërkon miratimin nga Parlamenti.
Grupi i Partisë Popullore Evropiane ka fituar të paktën 267 vende, krahasuar me 159 vende të siguruara nga Socialistët.
"Është një zhgënjim i hidhur, kishim shpresuar për rezultate më të mira" deklaroi Martin Schulz, kreu i grupit të Socialistëve Evropianë. "Në shumicën e vendeve rezultatet tona ishin shumë zhgënjyese".   

    PRESIONI NDAJ DISA QEVERIVE

    Shumë votues evropianë janë të shqetësuar nga rritja e papunësisë dhe besojnë se BE-ja nuk ka bërë aq sa duhet për përballimin e krizës ekonimike, edhe pse ka akorduar mjete të mëdha financiare në përpjekje për rimëkëmbjen e ekonomisë së Evropës. Përveç ekonomisë dhe punësimit, çështje të tjera duket se pak u interesojnë qytetarëve evropianë.
Kritikët ndaj bllokut 27-anëtarësh mund të shfrytëzojnë pjesëmarrjen e ulët të elektoratit prej 375 milion zgjedhësish si provë se "parlamenti nuk ka legjitimitet dhe se blloku ka humbur kontaktet me 495 milion qytetarët e tij".
Edhe pse zgjedhjet evropiane nuk kanë pasoja të drejtëpërdrejta mbi partitë në pushtet, ato mund të përballen me rritjen e presionit brenda vendeve të tyre për ndryshimin e politikave apo përbërjes së kabineteve.