PORTRET - BOIKO BORISOV - NJË ISH-TRUPROJË, FITUES I ZGJEDHJEVE NË BULLGARI

Boiko Borisov, ish-zjarrfikës dhe ish-truprojë, aktualisht kryetari i Bashkisë së vrullshme të Sofjes, është fituesi i zgjedhjeve legjislative të së dielës në Bullgari në krye të opozitës së qendrës së djathtë, por ai duhet të gjejë një partner për të formuar një mazhorancë parlamentare.
Djali i një polici dhe një mësueseje, Borisov, 50 vjeç, një muskuloz trupmadh, me flokë të qethur shkurt dhe fytyrë zeshkane, punoi fillimisht si zjarrfikës. Praktikues i karatesë së nivelit të lartë, ku ka fituar brezin e zi, ai ka dhënë mësime karatje në klubin sportiv të Ministrisë së Brendshme.  
Pas rrëzimit të komunizmit në vitin 1990, Boiko Borisov, themeloi ndërmarrjen e tij, Ippon, e specializuar fillimisht për tregtimin e tekstileve përpara se të bëhej truprojë. Ai garantonte sigurinë e ish-diktatorit komunist Todor Jivkov pas shkarkimit të tij më tej me atë të ish-mbretit Simeon II të Saxe-Cobourg-Gotha me kthimin në vend në vitin 1996 pas 50 vjetë mërgimi.
"Kam patur fatin e rrallë të dëgjoj, në një atmosferë jozyrtare, si numrin një të komunizmit dhe antipodin e tij, ish-monarkun. Ajo që kam dëgjuar prej tyre më bëri të kuptoja historinë, mekanizmat e pushtetit në kuadrin e ekonomisë dhe politikës së jashtme", i deklaroi pesëdhjetëvjeçari AFP-së.
Pasi ish-mbreti u bë kryeministër i mbështetur nga një valë entuziazmi popullor në vitin 2001, Boiko Borisov u ngarkua me veprimtarinë operacionale në Ministrinë e Brendshme dhe u shpall gjeneral. Gjithmonë i pranishëm në vendin e krimit apo të aksidentit, duke kritikuar mungesën e efektshmërisë së drejtësisë, ai siguroi një popullaritet të madh, pasi shumë qytetarë shihnin tek ai "dorën e fortë" përballë kriminalitetit.
Që prej nëntë vjetësh, ai ndodhet në krye të klasifikimeve të popullaritetit bashkë me presidentin e djathtë Guergui Parvanov.
Pasi u zgjodh kryetar i bashkisë së Sofjes në vitin 2005, performanca e tij u bë më pak bindëse, kryeqyteti vazhdoi të përballej me problemin e trajtimit të plehërave dhe të bllokimeve të rënda të trafikut.
Ai themeloi në dhjetor të vitit 2006 partinë Qytetarë për një zhvillim evropian të Bullgarisë (GERB, qendër e djathtë), e mbështetur gjerësisht nga kryetarët e bashkive të vendit dhe që u bë shpejt partia kryesore e opozitës. Falë karizmës së tij, Boiko Borisov arrin të hyjë në arenën politike, por ia beson drejtimin operacionl të GERB-it ish-"krahut të tij të djathtë" në Ministrinë e Brendshme, Tsvetan Tsvetanov. 
Sipas analistëve, popullariteti i tij i madh shpjegohet me mënyrën e tij të të folurit lirshëm dhe me kritikën ndaj apatisë së qeverisë dhe aparatit shtetëror. Duke folur me një ton të çlirët, ai është i kursyer në fjalë dhe përdor shpesh nënkuptime. Kështu, ai bëri që të krijohej një situatë ankthi lidhur me planet e tij pas fitores.
"Për të bërë reforma, për të kryer ndryshime radikale, nevojitet një shumicë", theksoi ai për AFP-në përpara zgjedhjes. I matur kur është fjala për koalicione, ai theksoi se një partner i vogël i mundshëm mund të ishte një ndihmë e madhe për të.
Shoqja e Boiko Borisovit, Tsvetelina Borislavova, është bankiere. Në shtëpinë e tyre luksoze në periferi të Sofjes, ku shihen plot trofe gjahu, ai mban tre qen gjahu të racës bullgare "berger"