KOSOVË - THAÇI TAKIME TË SHUMTA NË SAMITIN E KROACISË

Stabiliteti dhe paqja hapin perspektiva për Kosovën e rajonin, tha kryeministri i Republikës së Kosovës, Hashim Thaçi gjatë takimeve me personalitete të ndryshme politike në samitin e Kroacisë me temë “ Imperativat strategjike të Evropës: Energjia, Investimet dhe Zhvillimi”.
Thaçi ka zhvilluar takime me zëvendëssekretarin amerikan të Shtetit, James Steinberg, përfaqësuesin e Presidencës së radhës të BE-së, ministrin e Jashtëm të Suedisë, Karl Bildt dhe me përfaqësuesen e Parlamentit Evropian, Doris Pack.
Gjatë qëndrimit në Dubrovnik Thaçi ka takuar edhe kryeministren e Kroacisë, Jadranka Kosor, kryeministrin e Malit të Zi, Milo Gjukanoviç, kryeministrin e Bosnje-Hercegovinës, Nikola Spiriç, ministrin e Jashtëm të Sllovakisë, Miroslav Lajçak, ministrin e Jashtëm të Maqedonisë, Antonio Miloshoski dhe ministrin për Çështje Evropiane të Turqisë, Egemen Baish.
Në këto takime, kryeministri Thaçi ka prezantuar përkushtimet e institucioneve të Republikës së Kosovës për stabilitetin politik dhe zhvillimin ekonomik në Kosovë dhe në rajonin e Evropës Juglindore.

Në këto takime kryeministri Thaçi është fokusuar edhe tek fryma bashkëpunuese dhe e fqinjësisë së mirë, që po promovon qeveria e Republikës së Kosovës me vendet e rajonit.
''Stabiliteti dhe paqja hapin perspektiva për investime, për zhvillim dhe për të gjitha iniciativat tona të përbashkëta'', ka theksuar kryeministri Thaçi.