POLICIA E SHTETIT : DREJTUESIT E AUTOMJETEVE QË NUK RESPEKTOJNË KODIN RRUGOR DO TË NDËSHKOHEN MAKSIMALISHT

Policia e Shtetit do të ndëshkojë maksimalisht të gjithë ata drejtues të automjeteve që nuk respektojnë rregullat e qarkullimit rrugor. 

Aksidentet rrugore gjate periudhës se sezonit turistik dhe veçanërisht ato të ndodhura ditët e fundit,  kanë krijuar një situatë  shqetësuese, bëjnë të ditur për ATSH-në burimet zyrtare të Policisë së Shtetit. 
Policia Rrugore, e mbështetur dhe nga policia e Rendit dhe e Forcave Lëvizëse Operacionale, prej disa ditësh ka kaluar në shërbim të përforcuar, duke shtuar prezencën e saj në akset rrugore. 
Sipas burimeve të policisë, janë ngritur disa grupe Taskë Forcë, të drejtuar nga Drejtoria e Policisë Rrugore për të operuar në të gjithë territorin e vendit. I është dhënë kompetencë Patrullave të Përgjithshme të Policisë së Shtetit për të operuar në fushën e qarkullimit rrugor. 
Ndërsa vetëm dy muajve të fundit, nëpërmjet pikave të kalimit kufitar kanë hyrë dhe dalë nga Shqipëria 579 540 automjete, ose 133 mijë automjete më shumë se e njëjta periudhë e vitit të kaluar, Policia e Shtetit i  kërkon të gjithë drejtuesve të automjeteve  që të zbatojnë me rigorozitet normat e sjelljes së Kodit Rrugor, dhe të ndërgjegjësohen për pasojat e rënda që sjell mos zbatimi i këtyre rregullave për ta, pasagjerët apo qytetarët e tjerë. 
Gjatë këtij shtatë mujori, bëjnë të ditur burimet , janë vendosur rreth 355 mijë gjoba dhe janë hequr rreth 6 mijë patenta, 70% e të cilave janë hequr për shpejtësi tej normave të lejuara.
Duke iu referuar shifrave të viteve të shkuara, thuhet në njoftimin e Policisë së Shtetit, për muajin korrik 2009 janë shënuar 148 aksidente rrugore, me pasojë vdekjen e 48 prej të aksidentuarve dhe 46 prej tyre të plagosur rëndë.
Në të njëjtën periudhë të vitit të shkuar, numri i aksidenteve ishte 105, ku 25 prej tyre humbën jetën dhe 33 të tjerë morrën plagë të rënda./m.sh//a