QEVERIA, NDIHMË FINANCIARE PËR 4 FAMILJET E OFICERËVE TË POLICISË SË SHTETIT, VRARË NË KRYE TË DETYRËS

Këshilli i Ministrave do të japë një ndihmë financiare prej 5 milionë lekësh, për secilën nga familjet e 4 policëve të vrarë në krye të detyrës.
Sipas zyrës së shtypit pranë kryeministrisë, në mbledhjen jashtë radhe (7 gusht), Këshilli i Ministrave vendosi për dhënien e ndihmës financiare, prej 5 milionë lekësh, për secilën nga familjet e të ndjerëve Fatos Xhani, Kastriot Feskja, Saimir Duçkollari dhe Altin Dizdari, ish-punonjës policie në Drejtorinë e Përgjithshme të Policisë së Shtetit, vrarë në krye të detyrës.
Sipas vendimit të Qeverisë “ky fond do të përballohet nga fondi rezervë i buxhetit të shtetit”.
Katër punonjësit e Policisë së Shtetit ranë në krye të detyrës gjatë operacionit të zhvilluar në qytetin e Durrësit për arrestimin e të shumëkërkuarit, Dritan Dajti, i cili hapi zjarr ndaj tyre. Me një vendim të posaçëm të Këshillit të Ministrave, 4 oficerët e Policisë së Shtetit u shpallën Dëshmorë të Atdheut.