“EuroMat”, Operacioni që kapi mat trafikantët

Përfundon me sukses operacioni “EuroMat”, sekuestrohen 33 320 euro false, arrestohen dy persona

Në orët e para të ditës së sotme,strukturat e Drejtorisë Kundër Krimit Financiar në Policinë e Shtetit kanë përfunduar me sukses operacionin policor të koduar “EuroMat” gjatë të cilit është bërë i mundur arrestimi në flagrancë i shtetasve:

1. Skënder Selim Buçpapaj , vjeç 37, lindur në Tropojë dhe banues në Tiranë

2. Entela Hasan Dardha, vjeç 29, lindur në Mat dhe banuese në Tiranë.

Këta shtetas akuzohen për veprën penale te vënies në qarkullim të  monedhave te falsifikuara në  bashkëpunim, parashikuar nga neni 183/ 2 i Kodit Penal  dhe “prodhimit dhe shitjes së narkotikëve”  parashikuar nga neni 283  i Kodit Penal.

Arrestimi i tyre u bë pas një investigimi  disa mujor. Këta shtetas u kapën në  flagrancë teksa po tentonin të këmbenin një shumë të konsiderueshme kartëmonedhash  euro false.

Nga kontrolli i këtyre personave, i automjetit në pronësi të njërit prej tyre dhe i banesave, u gjetën dhe sekuestruan:

- Një sasi prej 33 320 euro, kartëmonedha të gjitha të prerjes  20 euro me dy numra serie të njëjtë,

-një sasi  lëndë narkotike e dyshuar heroinë për përdorim dhe qese e mostra për shitje  ne treg,

- dy vula  të falsifikuara  të shoqërive tregtare,

-6 telefona celularë,

si dhe një makine  tip  BMV me targë  TR 2729 F.

Nga  hetimet  ka rezultuar se këta dy shtetas janë  pjesë e një rrjeti të trafikut ndërkombëtar të eurove të falsifikuara dhe drogës. Vazhdojnë hetimet për  zbulimin e personave të tjerë të implikuar.

Materialet në ngarkim të tyre i kaluan për ndjekje të mëtejshme Prokurorisë së Tiranës.