PS,Rama:Kriza, qeveria po zvarrit zgjidhjen

Kyetari i Partisë Socialiste, Edi Rama, në një bashkëbisedim me gazetarët, theksoi se mazhoranca tregoi mungesë respekti në seancën e një dite më parë duke mos e marrë seriozisht ftesën që i bërë opozita dhe hyrjen e tyre në Kuvend. Rama u shpreh se nëse kryeministri Berisha nuk pranon hapjen e kutive opozita do të kthehet në rrugë duke organizuar protestat më të mëdha që janë bërë në vend.
Më poshtë fjala e plotë e Kryetarit të PS Edi Rama:
Si çdo të premte, kemi kënaqësinë e këtij takimi pak të ndryshëm nga ditët e zakonshme. Dua që në qendër të këtij bashkëbisedimi sot të vendos keqardhjen për reagimin e djeshëm të qeverisë ndaj hapit të hedhur nga opozita në kërkim të zgjidhjes së krizës. Një reagim i padenjë për nivelin e përgjegjësisë së drejtpërdrejtë që ka qeveria për zgjidhjen e krizës, i padenjë për momentin shumë delikat që kalon vendi dhe pritshmërinë legjitime të qytetarëve të këtij vendi për zgjidhjen e krizës, por edhe i padenjë në raport me detyrimin e përbashkët ndaj një komuniteti ndërkombëtar të shqetësuar, por edhe me plotë të drejtë dhe të angazhuar në kërkim të zgjidhjes së krizës.
Dje për fat të keq, pushteti u soll si të mos kishte krizë dhe e bëri këtë me vetëdije të plotë, në një përpjekje për ta trajtuar hyrjen tonë në parlament si pjesë të argumenteve të turpshëm të një propagande që vazhdon prej muajsh, për ta eksportuar krizën e thellë të demokracisë, krizën e thellë të shtetit të së drejtës, të ekonomisë, krizën në tërësi brenda Partisë Socialiste, përmes instrumenteve të një propagande që mbështetet nga fuqi mediatike të sponsorizuara drejtpërdrejt nga pushteti.
Sigurisht që keqardhja nuk mjafton dhe padyshim që ne jemi edhe më të vendosur për ta çuar përpara betejën tonë drejt zgjidhjes së një krize, që është një krizë e mirëfilltë demokratike në vend.
Kjo është arsyeja pse sot unë dua njëkohësisht t’i bëj apel komunitetit ndërkombëtar, për të mos lejuar që kjo krizë të rëndohet, për shkak në radhë të parë të refuzimit të qeverisë për ta njohur krizën. Një refuzim i papranueshëm dhe një shprehje e pa pranueshme e shpërfilljes në fakt të vetë komunitetit ndërkombëtar, dhe të qëndrimit të tij të materializuar në një dokument si është Rezoluta e KiE, ku flitet për krizë.
Së treti, dua të nënvizoj se sot, ne prisnim një lëvizje për të vënë në lëvizje mekanizmin e debatit lidhur me ofertën tonë, në  instancën e duhur të parlamentit dhe ndërkohë, jo vetëm që asgjë nuk ka ndodhur në këtë drejtim, që është drejtimi i duhur, por përkundrazi, vëmë re me keqardhje dhe me shqetësim përpjekjen për ta trajtuar ofertën tonë si një nga pikat e kalendarit të rutinës parlamentare. Ky është një gabim infantil, fëminor, i një pushteti i cili vazhdon të tregojë arsyen e forcës, ndërkohë që ne vazhdojmë të përpiqemi me forcën e arsyes. S’ka dyshim se cilido që mendon se ne shkuam në kuvend për të futur në një kanal zvarritës kauzën tonë, jo vetëm mendon gabim, por në rastin e vetë pushtetit që kështu mendon, merr një përgjegjësi të madhe për të gjitha pasojat e kësaj sjellje të papërshtatshme në raport me krizën dhe në raport me vullnetin e popullit opozitar, për ta zgjidhur këtë krizë nëpërmjet përfaqësuesve të vet në parlament.
Përgjigjet e pyetjeve
- Ne nuk kemi depozituar dy projektligje, ne kemi depozituar një dokument amendamentesh të ligjit ekzistues dhe një projektvendim për të ngritur komisionin hetimor parlamentar, mbi ligjin ekzistues.
-Prononcimi im para grupit parlamentar të Partisë Socialiste  dhe opinionit publik dhe para jush, si edhe prononcimi i Kryetarit të Asamblesë Kombëtare në parlament, janë qartësisht shprehje e vullnetit për ta zgjidhur krizën në çdo rrugë të mundshme. Njëra nga rrugët e mundshme është rruga e parlamentit, të cilën nëqoftëse ne do ta gjejmë të mbyllur, pa asnjë dyshim nuk do të heqim dorë nga përpjekja jonë, por pa humbur kohë, do ta kthejmë përpjekjen tonë në një protestë të pandalshme derisa të vihet në vend e drejta jonë. Ne këtë e kemi thënë, nuk është një gjë e re, sigurisht në këtë periudhë për t’i dhënë shans zgjidhjes përmes dialogut dhe për ti dhënë shans mirëkuptimit, duke vlerësuar njëkohësisht edhe angazhimin e komunitetit ndërkombëtar, duke respektuar edhe gjithçka që kemi bashkëbiseduar me miqtë dhe partnerët ndërkombëtarë, ne e kemi ulur, apo relativizuar shumë përkohësisht, në bisedat tona, tonin që ka të bëjë me protestën. Por s’ka pikë dyshimi se protesta është jo vetëm në axhendën tonë, por është pa diskutim edhe një mënyrë demokratike që ne do ta përdorim pa asnjë ngurim, dhe e përsëris pa ndalim, në rast se gjithçka tjetër do të ezaurohet kështu siç po e ezauron dita ditës ky pushtet, që ende për fat të keq nuk po do ta shoh të vërtetën në sy dhe ende kërkon t’ju fsheh shqiptarëve krizën e madhe që ka prodhuar me papërgjegjshmërinë dhe paaftësinë e vet në të gjitha planet, jo vetëm në planin e demokracisë.
Megjithatë, unë dua ta ritheksoj, se ne jemi të vendosur që t’i japim çdo shans dhe çdo mundësi të gjitha palëve për të krijuar kushtet për të zgjidhur një problem themelor të së ardhmes së vendit, që është problemi i lirisë dhe ndershmërisë së zgjedhjeve.
-Ne nuk kemi pritur dhe nuk po presim. Ne jemi në veprim aktiv dhe të vazhdueshëm dhe po përdorim çdo instrument. Dje Kryetari i Asamblesë Kombëtare të partisë, duke i folur parlamentit dhe opinionit publik, bëri një sfidë dhe edhe kjo sfidë është pjesë e përpjekjeve tona për të bashkëpunuar jo vetëm me palën tjetër, por edhe me ju, me median, me opinionin publik në kërkimin e rrugës për realizimin e  transparencës, gjithmonë nëpërmjet forcës së arsyes.
Zoti Berisha ka kohë që vajton publikisht, apo bën sikur vajton humbjen e një mandati në Fier, për shkak të një vendimi që sipas tij të gabuar të gjykatës, lidhur me votimin në komunën e Ruzhdies, në një qendër votimi dhe duke thënë këtë, thotë se megjithatë ai respekton vendimin e gjykatës.
Ne e kemi thënë dhe e përsëritim pa u lodhur çdo ditë, se kërkesa jonë për transparencë nuk ka absolutisht asnjë lidhje me vendimet e gjykatave apo me rezultatin e zgjedhjeve të shkuara.
Për këtë ka një rast për shembull që mund t’i referohen të gjithë, që është rasti i të njëjtës zgjidhje, për të njëtën arsye të transparencës, që është dhënë në parlamentin skocez, ku është bërë transparencë e kutive të votimit. Por, le të qëndrojmë te sfida e bërë dje nga ana jonë në parlament, nëpërmjet Gramoz Ruçit dhe tek kutia e bërë e famshme nga vetë z.Berisha, e Ruzhdies. Aty PD dhe koalicioni i saj ka korrur një fitore spektakolare, që sipas Berishës i është mohuar nga gjykata. Ndërkohë, që ne jemi të mendimit, që janë të gjitha kushtet dhe mundësitë që ajo kuti të hapet përpara publikut dhe në rast se nga vlerësimi i dokumentacionit zgjedhor që gjendet në atë kuti do të rezultojë ajo që pretendon Berisha, dhe nuk do të rezultojë ajo që pretendojmë ne, atëherë që palët kanë të gjitha arsyet për të reflektuar lidhur me bindjet e tyre. Por në rast se do të provohet e kundërta, sigurisht që janë të gjitha arsyet që palët të përparojnë në këtë përpjekje për transparencë. Në atë kuti janë të gjitha mundësitë për të parë se si funksionon mekanizmi i korrupsionit elektoral që ne e kemi identifikuar edhe pa atë kuti dhe që pa e shkëputur një herë e mirë nga trupi i zgjedhjeve, jemi të bindur se nuk do t’i arrijmë kurrë ti shërojmë zgjedhjet. Transparenca na duhet për të shembur sistemin e korrupsionit elektoral brenda gjithë procesit të administrimit zgjedhor dhe nuk na duhet për të ndryshuar rezultatin, nuk na duhet për të marrë pushtetin në tavolinë. Transparenca na duhet për të nxjerrë përpara publikut mekanizimin e funksionimit të korrupsionit, në funksion të deformimit të rezultatit, për të nxjerrë para publikut një të vërtetë të tmerrshme të mënyrës barabare të trajtimit të votës së çdo shqiptari, të çdonjërit nga ju. Ju siguroj që secili nga ju që jeni në tryezë, si qytetarë, si votues jeni plotësisht të interesuar të shihni nëse është e vërtetë ose jo çka ne pretendojmë dhe kur të shihni të vërtetën, do të jeni shumë më të bindur në drejtësinë e kësaj kauze, që nuk është kauza e një pale kundër një tjetre, sepse nuk është një mjet për të marrë pushtetin, por është kauza e demokracisë në Shqipëri, e cilësisë së procesit të demokracisë në Shqipëri, që gjithsecili me votën e tij të kontribuojë në marrjen e një vendimi të përbashkët të një populli të tërë.
E përsëris, zoti Berisha për të mbyllur këtë krizë, për të zgjidhur këtë problem të madh që vetëm do të rëndohet, dhe të jeni të sigurt se ne nuk do ta lëmë pa e zgjidhur, mjafton të ketë vullnet dhe gjithçka futet në rrugën e duhur, duke bërë hapjen e një kutie të vetme dhe jo të një kutie ku ne pretendojmë se kemi fituar, por të një kutie, ku zoti Berisha pretendon se ka fituar.
-Së pari, sfidoj arkivat tuaja të medias, për të nxjerrë një herë të vetme, në një vend të vetëm deklaratën timen, apo të cilitdo tjetër, që ka thënë se do të djegim mandatet tona. Gjithmonë kemi thënë që mandatet tona nuk do të digjen. Sigurisht nuk kemi qenë aspak të detyruar të bëhemi pjesë e një loje që ka synuar të spostojë vëmendjen nga thelbi që janë kutitë.
Së dyti, Këshilli i Evropës mund ta pyesë Komisioni e Venecias, nëse do të sqarojë më mirë këndvështrimin e vet. Ne nuk kemi nevojë as ta pyesim Komisionin e Venecias dhe as presim nga Komisioni Venecias të na zgjidhë ne problemin.
Së treti, ne kemi depozituar në parlament jo amendime të kushtetutës, por amendime të ligjit, për ta bërë me ligj atë që sot është thjesht një ofertë e palës tjetër në përgjigje të kërkesës tonë, pra që shumica në komision t’i takojë opozitës dhe nga ana tjetër për ta ligjëruar transparencën e zgjedhjeve përmes parlamentit, jo vetëm për këtë herë, por për çdo herë tjetër, duke i dhënë çdo opozite në të gjitha kohët mundësinë që me shumicën në komision hetimor të hetojë jo për përmbysjen e rezultatit, por për të nxjerrë në pah ecurinë e administrimit zgjedhor si një mundësi që populli ia jep parlamentit përmes kontrollit parlamentar.
Çfarë bën parlamenti? Parlamenti bën ligje. Çfarë është kontrolli parlamentar? Kontrolli i parlamentit për zbatimin e ligjeve. Pse janë komisionet hetimore? Për t’i dhënë mundësi parlamentit për ta ushtruar këtë kontroll parlamentar duke hetuar për çështje të veçanta me interes publik në funksion të zbatimit të ligjshmërisë. Çfarë po heton apo duhet të hetojë parlamenti sipas nesh? Duhet të hetojë mënyrën se si ligji i tij, ligjet e këtij vendi zbatohet në procesin më të rëndësishëm të demokracisë, që janë zgjedhjet. Dhe se si administrata zgjedhore funksionon nga komisioneri në fshatin më të largët deri te kryetari i KQZ. Këtë askush nuk mund t’ja pengojë parlamentit dhe askush nuk mund të thotë se parlamenti nuk ka të drejtë ta bëjë.  Pjesë e këtij kontrolli janë edhe kutitë, ku nuk bëhet fjalë për rinumërim votash për korrigjim rezultati, por bëhet fjalë për hetim, qoftë për numërimin, pra sa e ka afektuar rezultatin numërimi i keq dhe shumë i keq në 1/3 e qendrave të numërimit dhe kjo për të nxjerrë konkluzione nëse ka apo jo subjektivitet, pra vullnet të mbrapshtë për të deformuar numërimin apo nëse duhet rregulluar procesi i numërimit në të ardhmen dhe për të hetuar mënyrën se si janë hartuar, se si janë trajtuar listat e votuesve dhe se si ka funksionuar procesi i identifikimit të tyre. Të gjitha këto janë pjesë e mënyrës së administrimit të zgjedhjeve dhe kush mund të thotë që këto nuk mund të hetohen. Pra këto duhet të jenë të gjitha të mbyllura dhe askush nuk paska të drejtë të hetojë e për më tepër i hiqet parlamentit e drejta të hetojë për mënyrën se si zbatohet një ligj në procesin më të rëndësishëm. Kjo është diçka e paimagjinueshme dhe mos harroni se sot një gjë e tillë as nuk diskutohet fare në vendet me demokraci të konsoliduar, sepse nuk diskutohet fare çështja e transparencës së kutive. Është një çështje e mbyllur prej kohësh. Ju solla një rast konkret, në një parlament të Evropës, ku kjo gjë është bërë pikërisht për të hetuar procesin. Këtu jemi në kushtet e një refuzimi, që ka vetëm një arsye, arsyen që pushteti dhe personalisht zoti Berisha e di që transparenca mund t’i turpërojë para popullit. Por, kjo nuk mund të jetë një arsye për popullin për të hequr dorë nga transparenca dhe nuk mund të jetë arsye as edhe ata vetë, sepse nuk po kërkojmë asgjë më shumë se hetim i përbashkët në mënyrë që të mos jemi të gjithë bashkë të turpëruar përpara shqiptarëve dhe gjeneratës së re, që të mos jetë dot në gjendje të bëjë një votim normal në këtë vend. Të mos jemi të gjithë të turpëruar përpara faktit që nuk bëjmë dot në këtë vend zgjedhje.
- Krizat e demokracisë janë shumë më të rënda sesa krizat aritmetike të Parlamentit. Krizat aritmetike në parlament janë shunë më të lehta për tu zgjidhur sesa krizat e demokracisë të përkthyera në konfikte mes popullit dhe pushtetit. Për sa i përket apelit ndaj komunitetit ndërkombëtar është një apel që unë e bëj pasi ne kemi ndërmarrë një hap të shumë kërkuar nga komuniteti ndërkombëtar me të drejtën e një këndvështrimi, që vjen nga një distancë e caktuar, ku nuk mund të perceptohen të plota arsyet tona dhe ne e mirëkuptojmë këtë dhe në kushtet kur ka një moment oportun për të mos u fokusuar mbi bojkotin, por për tu fokusuar mbi krizën dhe thelbin e krizës. Sot nuk ka bojkot, por kriza është mes nesh dhe që kriza të zgjidhet nuk mund t’i adresohemi bojkotit, por ti adresohemi krizës. këtë e kemi thënë me kohë, sot e themi për komunitetin ndërkombëtar duke besuar që janë të gjitha mundësitë që komuniteti ndërkombëtar t’i adresohet krizës drejtpërdrejtë duke kërkuar që kjo krizë të zgjidhet, pa qenë i penguar nga perceptimi për vetë bojkotin. Thënë kjo, dua nga anën tjetër të nënvizoj që tanimë kemi një komunitet ndërkombëtar tërësisht të angazhuar për ta adresuar krizën. Ne jemi këtu në një pozicion dinamik, jo në një pozicion statik dhe dinamika e ngjarjeve është e pandalshme.
- Së pari, argumentat e Sali Berishës na mjafton t'i dëgjojmë nga pala tjetër për tu dhënë përgjigje, s'kemi pse ju japim përgjigje dy herë.
Së dyti e përsëris, nëse shumëkush ra në grackën e idesë qesharake se ne do t'ia dorëzonim mandatet Saliut, Ilirit, Fatosit për të kooptuar dhe emëruar një opozitë tjetër në parlament duke krijuar një telenovelë pa fund të kujt janë mandatet, e ka kush e ka, ky nuk është faji ynë. Ne asnjëherë nuk na ka shkuar ndërmend ideja që ti hyjmë kësaj valleje, që do të ishte tragjikomike për demokracinë dhe për opozitën në rast se thjesht do ta imagjinonim, por asnjëherë nuk kemi folur për këtë, sepse s'kemi dashur që vëmendje të spostohet, duke qenë të bindur se ky ka qenë qëllimi i kësaj ideje dhe padyshim edhe shpresa dhe dëshira e madhe e të gjithë atyre që mezi e kanë pritur datën 6 mars, aq shumë sa të gjithë ju harruat 7 marsin, harruat 8 marsin. Ja ku doli që s'do ketë 6 mars, do ketë 6 mars, por do jetë një datë si gjithë të tjerat.
- Ne kërkojmë një zgjidhje me bazë të gjerë për transparencën. Përsa i përket pastaj zgjidhjeve të tjera me bazë të gjerë këto janë mekanizma që sigurisht unë nuk kam asnjë arsye pse ti paragjykoj apo ti komentoj, por gjithsesi, nuk zgjidhin këtë problem që ne kemi sot që nuk është një problem për pushtetin, por është një problem për të ardhmen e vendit dhe të demokracisë.
- Ne jemi në pritje që ta zgjidhim çështjen në parlament. S'jemi në kushtet kur duhet të flasim çdo të ndodhë brenda 6 ditëve, jemi në kushtet kur duhet të flasim se ç'do të ndodhë brenda 6 ditësh. Dhe nga na tjetër të jeni të bindur që vala e protestave që do ngrihet në Shqipëri, në rast se kjo lojë për të zvarritur opozitën do të vazhdojë, do të jetë vala më e madhe që Shqipëria ka parë për votën e lirë dhe do të jetë një valë protestash që nuk do të ulet pa garantuar votën e lirë.
- Janë dy gjëra që s'kanë lidhje, njerëzit që kërkojnë këtë të drejtë janë plotësisht të vendosur në kërkimin e kësaj të drejte dhe plotësisht të arsyeshëm për nevojën e të gjithë rrugëve për ta realizuar të drejtën. Ne duam të realizojmë një objektiv i cili është publik dhe i cili është në interes të të gjithë publikut dhe për ne është e domosdoshme të eksplorojmë çdo rrugë, çdo mundësi, çdo shans. Ne nuk e kemi kufizuar asnjëherë veten dhe nuk do ta kufizojmë. 6 muajt e para na kanë vlejtur jashtëzakonisht shumë për ta kthyer këtë në një çështje të madhe të interesit publik përmes rritjes së vëmendjes së publikut dhe njëkohësisht për ta ndërkombëtarizuar këtë çështje, që sot është në çdo tryezë ndërkombëtare ku flitet për Shqipërinë. Kemi hyrë në një fazën të dytë që është faze e konkretizimit të betejës sonë dhe padyshim që ne do të bëjmë gjithçka për ta konkretizuar këtë betejë jo në të mirën tonë apo në interesin tonë, por në të mirën dhe në interesin e  të gjithëve dhe në funksion të vendosjes së transparencës në themelin e procesit zgjedhor në Shqipëri.
- Së pari unë kam dalë këtu për të folur për ku jemi sot, se ku do jemi nesër, do kemi kohë të flasim nesër. Së dyti hapja  e kutive është një çështje me interes publik nuk është një çështje e kufizuar në interesin e Sali Berishës, të Edi Ramës apo të cilitdo mik dhe partner ndërkombëtar përfshirë në këtë debat. është një çështje me interes publik sepse ka të bëjë me vlerën e votës suaj. Ju siguroj se në çdo shoqëri demokratike thjesht diskutimi i kësaj çështje do të ishte një habi dhe stërzgjatja e këtij diskutimi do të ishte një absurditet.
- Kemi marrë të gjitha masat dhe po shfrytëzojmë të gjitha rrugët për të çuar përpara kauzën tonë. S'ka pikë dyshimi se kemi marrë rezultatet më të mira, madje më të mira seç i prisnim nga përpjekjet e këtyre gjatë muajve me themel bojkotin dhe do të vazhdojmë të kërkojmë zgjidhjen, pa përjashtuar asnjë rrugë, që do të thotë se është një pozicion dinamik, nuk është një pozicion statik dhe në këtë pozicion dinamik unë dhe gjithë lidershipi i PS, jemi në harmoni të plotë me vullnetin e popullit opozitar dhe me të gjithë ata që votuan me 93 % sikundër ju e thatë  për të rizgjedhjen time, apo edhe atyre 7% të tjerëve që nuk më votuan për të rizgjedhur mua, por votuan për të zgjidhur këtë problem.