PS:Berisha të tregojë vullnet për zgjidhjen e krizës

Partia Socialiste e ka konsideruar fshehje pas gjykatave, deklaratat e kryeministri Berisha, i cili vazhdon të tregojë mungesë vullneti për zgjidhjen e krizës politike në vend, edhe pse opozita ia dha shansin për ta bërë një gjë të tillë. Deputetja Valentina Leskaj, tha se Sali Berisha, me qëndrimin refraktar ndaj ofertës së PS-së, po kontribuon në radikalizimin e situatës.

Më poshtë, lexoni të plotë deklaratën e Deputetes Valentina Leskaj:

Për muaj me radhë, teksa përballej me vendosmërinë e aksionit opozitar për transparencën e zgjedhjeve të 28 qershorit, Sali Berisha betohej përpara shqiptarëve dhe partnerëve ndërkombëtarë se kishte vullnetin dhe dëshirën për të gjetur një zgjidhje përmes dialogut.
Sot, kur Partia Socialiste e ka hedhur hapin a parë drejt sigurimit të transparencës mbi 28 qershorin dhe drejt arritjes së një marrëveshjeje që do të zgjidhte krizën politike, që ka paralizuar vendin, kryeministri na dëshmoi se të gjitha këto deklarata kanë qenë veç përpjekje te sforcuara për t’u hedhur hi syve shqiptarëve dhe ndërkombëtarëve.
Partia Socialiste ka pritur këto ditë një përgjigje serioze për ofertën e bërë javën e shkuar në parlament, ofertë që i kontribuon zgjidhjes së krizës, po  deri sot nuk ka patur një të tillë.
Mënyra e sjelljes në seancën e Parlamentit nga drejtuesit më të lartë të PD, reagimi i Kryeministrit dhe refuzimi i tij, për të dhënë një përgjigje që do ta fuste krizën në rrugën e zgjidhjes, janë prova e qartë e mungesës së vullnetit politik për një hetim të plotë e të pakushtëzuar të zgjedhjeve të  Qershorit.
Sot Kryeministri u fsheh përsëri pas gjykatave për të justifikuar mungesën e vullnetit për zgjidhjen e krizës.
Me qëndrimin refraktar e shpërfillës ndaj ofertës vullnetmirë, serioze e ligjore të PS, me përpjekjen e sforcuar, për ta futur nismën në rutinën e kalendarit të parlamentit, kryeministri ka kontribuar në radikalizimin e situatës.
Kriza, është prezente dhe e gjithëpranuar, ajo nuk zgjidhet kur bën sikur nuk e sheh, zgjidhja e vetme është transparenca.
Askush nuk duhet të ketë frikë nga transparenca.
Këshilla jonë për Sali Berishën është se herët a vonë, ai duhet të gjejë kurajën ta përballojë këtë frikë.
Ai duhet të gjejë kurajën të përballet publikisht me të vërtetën për manipulimin e zgjedhjeve të 28 qershorit në rast të kundërt do të përballet me popullin opozitar.