Topi:Shqiptarët janë të vetëdijshëm për përballimin e sfidave integruese në Bashkimin Evropian

Presidenti Topi priti sot Komisionerin e BE-së për Zgjerimin dhe Politikën e Fqinjësisë, Shtefan Fyle, në kuadër të vizitës që Komisioneri po zhvillon në Serbi, Malin e Zi, Bosnje-Hercegovinë, Shqipëri dhe Kosovë.
Në këtë takim, Presidenti Topi vuri në dukje faktin se procesi i integrimit evropian gëzon një mbështetje të gjerë në gjithë shoqërinë shqiptare dhe se ai ka qenë dhe vazhdon të jetë një shtysë e fortë për transformimin e vendit nëpërmjet kryerjes së reformave të guximshme dhe zbatimit me sukses të tyre. Me këtë rast, Presidenti i Republikës bëri një panoramë të disa prej këtyre reformave, duke u ndalur kryesisht tek ajo për reformimin e sistemit të drejtësisë. Kryetari i Shtetit nënvizoi faktin se “shqiptarët janë të vetëdijshëm për përballimin e sfidave integruese në Bashkimin Evropian dhe konfirmoi se në kuadër të paraqitjes së kandidaturës sonë për statusin e vendit kandidat, ne jemi të angazhuar maksimalisht për përfundimin e dorëzimin në kohë të pyetësorit të BE-së, duke shpresuar gjithashtu në përshpejtimin e liberalizimit të vizave, një proces me rëndësi të veçantë ky për qytetarët shqiptarë.”
Në vijim të takimit biseda u përqendrua dhe në situatën aktuale politike në vend. Presidenti Topi vlerësoi pozitivisht rivendosjen e dialogut politik institucional mes mazhorancës dhe opozitës dhe shprehu “besimin se me vullnetin politik të palëve dhe angazhimin serioz të tyre, ekzistojnë të gjitha mundësitë që zgjidhja të vijë në mënyrë institucionale dhe në funksion të demokracisë dhe të interesave të qytetarëve shqiptarë.” Në këtë kontekst, Presidenti Topi trajtoi dhe zhvillimin e tryezës politike mes drejtuesve të mazhorancës dhe të opozitës në Presidencë, që prodhoi edhe rihyrjen e opozitës në Parlament.
Nga ana e tij, z. Fyle shprehu mirënjohjen dhe interesin e veçantë për këtë takim me Presidentin Topi dhe vlerësoi rolin e tij për rivendosjen e dialogut politik institucional mes mazhorancës dhe opozitës në vend. Komisioneri Fyle theksoi se sa më me saktësi dhe sinqeritet t’u përgjigjen autoritetet shqiptare pyetësorit, aq më e qartë dhe objektive do të jetë panorama mbi bazën e së cilës Bashkimi Evropian do të vlerësojë plotësimin e standardave integruese të Shqipërisë, sidomos për çështje që kanë të bëjnë me luftën kundër krimit të organizuar dhe korrupsionit, lirive thelbësore, shtetit të së drejtës dhe forcimit të demokracisë.
Duke diskutuar për situatën politike Komisioneri Fyle vuri në dukje rëndësinë e elementeve që përmbahen edhe në Deklaratën e përgatitur dhe bërë publike nga Komisioni para fillimit të vizitës në Tiranë, duke theksuar se nëqoftë se ngërçi politik dhe situata aktuale vazhdojnë dhe mbetet e pazgjidhur, kjo do të ngadalësojë procesin e mëtejshëm të integrimit. “Bojkotet nuk kanë vend në demokracinë evropiane.” – u shpreh Komisioneri Fyle, duke vënë në dukje se përgjegjësia do t’u mbetet udhëheqësve politikë nëse nuk do të arrijnë të gjejnë një zgjidhje.
Të dy personalitetet e larta ndanë të njëjtin mendim përsa realitetit më të qetë dhe qëndrueshmërisë në Ballkan dhe rëndësisë së bashkëpunimit gjithëpërfshirës mes vendeve të rajonit, pa përjashtim, me synim integrimin e plotë në gjirin e familjes evropiane.
Presidenti Topi e uroi zotin Fyle “për detyrën e tij të re, sa fisnike aq edhe të vështirë” duke i shprehur mirënjohjen për kontributin e veçantë dhe rolin e tij të rëndësishëm në kuadrin e integrimit të Shqipërisë në NATO, duke shprehur bindjen dhe optimizmin se Shqipëria do të dijë të plotësojë kushtet dhe detyrimet e kërkuara për anëtarësim sa më të shpejtë edhe zyrtarisht në Bashkimin Evropian.