PS:Votimet politike të njëanshme nuk janë kompromis

Gjetja e kompromisit bëhet e pamundur për aq kohë sa mazhoranca, jo vetëm ndërmerr veprime për ngritje pseudo komisionesh hetimore si ai i ditës së premte, por edhe përpiqet me kokëfortësi dhe pa asnjë sens llogjike t'u mbushë mendjen partnerëve ndërkombëtarë se votimet politike të njëanshme mund të quhen kompromis. Nuk mund të këtë kompromis që themelet i ka në veprime arbitrare, të ndërmarra nën diktatin e kartonëve, të cilat jo vetëm janë në kundërshti të plotë me rregullat e parlamentarizmit, por përbëjnë edhe një shkelje të hapur të ligjit dhe Kushtetutës. Partia Socialiste me anë të deputetit Damian Gjiknuri është shprehur se ky akt provokativ, ka rënduar më thellë krizën politike në vend, pasi vret çdo mundësi kompromisi për zgjidhjen e krizës. Vijimësia e kësaj sjelljeje kokëfortë të qeverisë, tha ai, do ta bëjë këtë të fundit plotësisht përgjegjëse për përkeqësimin e krizës së demokracisë në vend.
Më poshtë deklarata e plotë e deputetit të PS, Damian Gjiknuri:
“Partia Socialiste risjell edhe njëherë në vëmendjen e opinionit publik shkeljen e hapur të rregullores  së Kuvendit nga ana e mazhorancës qeverisëse në ngritjen e njëanshme të “pseudo” Komisionit Hetimor për zgjedhjet.
Ky akt provokativ, ka rënduar më thellë krizën politike në vend, pasi vret çdo mundësi kompromisi për zgjidhjen e krizës.
Nuk është rastësi, që edhe partnerët ndërkombëtarë e kanë dënuar një veprim të tillë, pasi për ta  si  për cdo demokraci të vërtetë, rregullat e sjelljes dhe vendimmarrjes në kuvend janë e vetmja garanci që e bëjnë një parlament pluralist funksional.
Në të kundërt, parlamenti rrezikon të kthehet në një farsë sipas interesave të dyshes Berisha- Topalli, të  cilët me aktin që bënë kërkojnë medoemos ta mbajnë opozitën jashtë kuvendit.
Gjetja e kompromisit bëhet e pamundur për aq kohë sa mazhoranca, jo vetëm ndërmerr veprime për ngritje pseudo komisionesh hetimore si ai i ditës së premte, por edhe përpiqet me kokëfortësi dhe pa asnjë sens llogjike t'u mbushë mendjen partnerëve ndërkombëtarë se votimet politike të njëanshme mund të quhen kompromis.
Nuk mund të këte kompromis që themelet i ka në veprime arbitrare, të ndërmarra nën diktatin e kartonëve, të cilat jo vetëm janë në kundërshti të plotë me rregullat e parlamentarizmit, por përbëjnë edhe një shkelje të hapur të ligjit dhe Kushtetutës.
Vijimësia e kësaj sjelljeje kokëfortë të qeverisë, do ta bëjë këtë të fundit plotësisht përgjegjëse për përkeqësimin e krizës së demokracisë në vend.”