Rrogat e deputetëve socialistë, nacionalizmat e kota të ballkanikëve dhe komisionet “ndërkombëtare” të PES!

Nga Besi BEKTESHI

Ka dashur zoti të na e mbushi ditën me informacione të shumta dhe shpesh herë jashtë retorikës së problemit kryesor që kemi...kutive ! Nuk ka asnjë dyshim që shqiptarët në këtë kohë, janë njerëzit që jetojnë me shumë me telenovela dhe jo në televizione, por në jetën e tyre të detyruar mediatiko-politike, sepse kështu ka shkuar puna me lidershipe dhe sisteme politike në partitë që kanë rol parësor në Shqipëri. Sërish po i kthehem virtualitetit si një pjesë e jashtëzakonshme e politikës në Shqipëri. Çfarë mund të kenë të përbashkët tre çështje të trajtuara në shtypin dhe televizionet tona ditët e fundit. Pra çfarë mund të kenë të përbashkët, rrogat e deputetëve socialistë, nacionalizmat e ballkanasve dhe propozimet për komisione ndërkombëtare për kutitë nga Rasmussen!? Më interesantja është se deputetët socialistë, sipas një të përditshmeje, nuk merrnin lekë nga Kuvendi i Shqipërisë, nuk pajiseshin nga ky kuvend me kartat e identitetit si deputet, nuk përfitonin privilegjet e qënies deputet si shumat e karburantit, celularëve dhe për më tepër deputetët kërkojnë pagën që nga muaji shtator, kur ka filluar kuvendi. Ky fenomen i mos dhënies së pagës në pikërisht gazetën në fjalë interpretohej si “persekutim” megjithëse në thonjëza nga Topalli, pikërisht për punën e kutive. Pra socialistët është e vërtetë që kanë kërkuar pagat dhe lekët e karburanteve dhe celularëve! Interesant kjo, shumë interesante. Por për çfarë ti kenë kërkuar vallë? Pagën e deputetit e kanë kërkuar se kanë marrë pjesë në sallë në mënyre të vazhdueshme që nga fillimi, pse kanë marrë pjesë në prodhimin e ligjeve, aprovimin e tyre, pjesëmarrjes në komisione, për çfarë vallë? Po i persekuton Topalli? Për çfarë, sepse nuk po ju paguan rrogën që nga shtatori, dhe pse, sepse kanë dalë në protesta për urdhër të PS-së, sepse kanë harxhuar karburant për të bërë punët e PS-së dhe të veprimeve ekstraparlamentare? Pse duhet të paguhen, sepse sa kanë hyrë kanë dalë, duke treguar se nuk e kanë seriozisht me kuvendin dhe rregullat në të? Absolutisht nuk i di dhe as që dua të di, mënyrën se si paguhen deputetë e Shqipërisë, por dembelët dhe ato që nuk janë të pranishëm, por edhe që bëjnë punët e partisë (jashtë kuvendit) me paret e qeverisë që ja merr popullit, nuk ka se si të përtypet si fenomen. Ju duhet paguar rroga njerëzve që nuk betohen në kuvend dhe mbasi betohen,  përsëri kryejnë bojkot të kamufluar duke tallur demokracinë dhe vetë kuvendin?!! Në fakt,  do të ishte një gabim deri në faj, po t’ju paguhet rroga njerëzve që nuk bëjnë asgjë ose më mirë, bëjnë atë gjë që nuk do asgjë mbarë në këtë vend. Kuvendi i Shqipërisë duhet t’ju paguajë celularët deputetëve që kryejnë dëshirat dhe urdhrat e PS-së në cilësinë e bojkotit dhe atakimit të tij (kuvendit) në mënyrë të vazhdueshme dhe aspak demokratike!!? Ky është edhe kulmi i “persekutimit” që sipas atyre që kështu e konceptojnë demokracinë, duke mos punuar, duke mos u angazhuar, dhe duke qenë “ostruksionistë” të paguhen edhe kur nuk janë, dhe nuk punojnë. Normalisht janë kërkesa dhe objeksione kot fare, të pa arsyeshme dhe të një natyre që shkon nga përfitimi deri në mizerabilitet logjik. Por, po në këtë linjë, dhe patjetër në të përbashkëtën e madhe, është edhe “plasja” e nacionalizmeve idiotë ballkanikë. Një nacionalizëm në shovinizëm kot fare dhe në mënyrë deçizive i pa logjikë deri në bubullimë shurdhuese. Një kompani zhytësish grekë që këndon këngë shovene dhe me brenda idiotizmin grek të viteve e viteve më përpara, në një festë përpara Presidentit grek! Çfarë maskarade në shtetin e përkëdhelur politikisht dhe financiarisht të Europës! Një demokraci që funksionon mbi baza thirrjesh idiote dhe pa asnjë lidhje me vitin 2010-të! Kjo është edhe stili grek i të bërit politikë kombëtare në sy të botës. Patjetër që në mediat greke kanë reaguar, nga politika greke është reaguar, por edhe në Shqipëri është reaguar dhe krahas protestave të drejta, është lejuar që disa inkoshientë në petkun e një nacionalizmi shqiptar të digjet flamuri grek. Mu duket vetja si palestinez, ndërkohë që Greqia është mbajtësja e 700.000 shqiptarëve! Dikush i mëson dhjetë njerëz që të djegin flamurë kombëtarë të vendit që e quajmë vënd mik dhe që merret me integrimin e Shqipërisë në Europë! Pastaj fill pas këtyre “patriotëve shqiptarë” me djegie flamurësh, dalin ca “shqiptarë minoretarë” që kërkojnë Vorio-Epirin dhe bëjnë edhe ato maskaradën e tyre greke me patriotizmin idiot grek, duke qenë shumë syresh normalisht shqiptar. Po a ka më virtualitet dhe kotësi se sa kaq. A mund të ketë më shumë se kaq kotësi politike dhe fqinjësie kote nga ana kombëtare? Një kompani ushtarësh që këndon kot ose në mënyre idiote këngë të poshtra, tre shqiptarë që djegin flamurin grek kot në këto momente dhe disa minoritarë që kot fare kërkojnë vorio-epirin. Dikush thotë, nuk janë kot këto gjëra! Por të gjithë e dimë që janë kot, megjithëse mund të kenë një qëllim jo të kotë. E dimë mirë se si grekët dhe shqiptarët askush nuk i pyet për të tilla nacionalizma dhe histeri idiotësh pa asnjë kuptim europian.  Kur nacionalizmin idiot dhe vrastar e kanë lënë Franca me Gjermaninë që kanë lënë në fushën e betejës miliona e miliona të vdekur...si ka mundësi që ne të bëjmë së bashku me grekët të “fortin” me ligjet e Europës! Si ka mundësi!? Patriotizmin askush nuk mund t’ja lejojë vetes ta lëshojë nga logjika dhe zemra e tij, por afshin nacionalist dhe shovinist dhe sidomos grekët në rastin e fundit, nuk duhet ta përdorin në asnjë rast dhe sidomos në institucionet e shtetit të tyre.
E fundit si temë “kotësie” është edhe “detyrimi”, i një prej socialistëve të mirë të PES-it ose Socialistëve Europianë, Poul Nyrup Rasmussen që është edhe Presidenti i organizmit për pikërisht propozimin e “komisionit PD dhe PS por edhe me ndërkombëtarë brenda”. Megjithëmend që Rasmunssen nuk mund të ketë faj, sepse të vetët e Shqipërisë, kushedi se çfarë i kanë thënë, por ama komision që deri dje është kërkuar Parlamentar që të jenë socialistët dhe demokratët dhe ndërkombëtarët, kjo ishte e magjishme. Duke ditur kërkesën ultimatum që kërkon “kutitë” dhe duke ditur që kutitë nuk i lejon ligji të hapen, Rasmussen nuk thotë hapni kutitë, por kërkon i shkreti ndërkombëtarët. E jashtëzakonshme!! Është koha e kotësive dhe humbjes së vetë kohës! Me të vërtetë është koha kur kotësitë dhe problemet e kota apo pa asnjë vlerë për Shqipërinë, trajtohen dhe stërtrajtohen në mënyrë banale dhe të turpshme. Qesharakë po bëhen edhe të huajt të cilët nuk dinë si ti rregullojnë frazat, nuk dinë si ta fusin fjalën “kuti” në frazën e  tyre. Nuk dinë në se duhet përdorur apo jo, nuk dinë si të komportohen me socialistët shqiptarë dhe liderin e tyre, i cili ka kutitë si “fanar ndriçues” në të gjitha fjalitë, termat dhe marrëveshjet që për tipin që ka, nuk janë marrëveshje, por janë “a merr vesh”. Kotësi simbolike me deputetë që nuk vijnë në parlament dhe kërkojnë pagesa, kotësi me nacionalizma në Greqi dhe pastaj edhe në Shqipëri, kotësi me kuti që shoqërohet edhe nga ndërkombëtarët të cilët të impenjuar dashje pa dashje nga ne, deklarojnë komisione tre palëshe kur mjafton vetëm një palë të denoncojë dhe kutitë hapen. Zoti na ruajt për kotësitë e sotme, që nuk bëjnë asgjë tjetër, por na zhvendosin në “without the necessary land”, pikërisht në “tokën e panevojshme” që askush nuk mund, dhe nuk duhet të preferojë.