Mëhilli: PD dënon aktin e kërcënimit ndaj deputetes Rajmonda Bulku

Më poshtë deklarata e plotë e zedhenses së PD:

Edvin Kristaq Rama, Gramoz Ruci, Ilir Xhelil Gjoni dhe pinjollët e tjerë të bllokut, që kanë burgosur bashkëpuntorët e tyre  në mes të bulevardit kurse për vete ushqehen në restorantet më luksoze, kërcënuan personalitetin e shquar të artit shqiptar e politik, deputeten dhe artisten e mirënjohur Rajmonda Bulku për fajin e vetëm se ajo denoncoi me guxim aktin barbar të Edvin Ramës ndaj fëmijëve të nënave që ai ka burgosur në mes të bulevardit.

Ata kërcënuan Rajmonda Bulkun sepse kjo grua e nënë shqiptare nuk mundi të pajtohej me terrorin psikologjik, psikodramën dhe lëndimin e thellë shpirtëror që përjetojnë vogëlushët që kanë nënat e tyre të ngujuara në grevën Rama – Ruci.

Partia Demokratike i thotë zotit Rama se ajo është e gatshme të respektojë plotësisht liritë dhe të drejtat e qytetarëve shqiptarë të garantuara në Kushtetutë por hedh poshtë me indinjatë kërcënimet banditeske alla mafia ndaj deputetes së saj dhe artistes Rajmonda Bulku dhe paralajmëron se autorët e këtij kërcënimi do të marrin përgjigjen më të merituar ligjore.