PS, aksidentet, Bilanc lufte në sezonin turistik

Partia Socialiste në deklaratën e sotme për shtyp, nëpërmjet deputetes Olta Xhaçka, ka shprehur shqetësimin e saj në lidhje me bilancin tragjik të humbjeve të jetës në rrugët e Shqipërisë, pavarësisht gjobave dhe shtimit të efektivave të policisë. Deputetja Xhaçka i ka bërë thirrje Ministrit të Brendshëm Basha që ti lërë retorikat boshe por të dal në terren për të analizuar e mbikëqyrur masat që po merren për të kufizuar bilancin tragjik në rrugë, për të kursyer humbjen e jetëve të bashkëqytetarëve tanë e për të mos ia nxirë vendit imazhin siç kemi bërë deri më sot.

 Më poshtë deklarata e plotë e deputetes, Olta Xhaçka:

Siguria është kthyer në një shqetësim madhor për të gjithë qytetarët ne këto ditë te nxehta gushti, ndërsa shohim mungesë reagimi dhe profesionalizmi nga Ministria e Punëve të Brendshme dhe Rendit Publik.

Sipas të dhënave që u prezantuan në analizën mujore të muajit Korrik nga Policia e Shtetit, ky muaj rezulton me një bilanc tragjik në rrugët e Shqipërisë, ku kanë humbur jetën 51 persona. Po sipas të dhënave të Policisë së Shtetit, muaji Korrik ka patur 151 aksidente, shumica tepër të rëndë. Nga këto të dhëna rezulton se një çdo tre aksidente në Shqipëri rezulton me humbje jete apo plagosje të rëndë. Ky bilanc mbetet tragjik pavarësisht numrit të gjobave apo efektivave në detyrë. Një bilanc i humbjes se jetës në rrugët e vendit qe i përngjan një bilanci lufte.
 
Partia Socialiste shpreh shqetësim për këto të dhëna e për masat e munguara nga ana e Ministrisë së Rendit. Ministria e Rendit Publik dhe Policia e Shtetit duhet të lëvizin menjëherë të sigurojnë jetën e shqiptarëve, në rrugë, në punë e kudo, duke marrë masa efektive sipas shembujve të të gjithë vendeve të zhvilluara.

Nuk është hera e parë që Shqipëria përballet me një bilanc të tillë tragjik gjatë sezonit veror, megjithatë si çdo vit tjetër ka një mungesë të theksuar masash për të parandaluar aksidentet e humbjen e jetës. Theksojmë edhe njëherë se shtimi i efektivave të policisë në rrugët e vendit është vetëm një nga masat që duheshin ndërmarrë. Masa të tjera si përmirësimi i sinjalistikës rrugore, sidomos natën, riparimi i  rrugëve që rezultojnë problematike, në shumë raste pranë lokaliteteve të pushimeve, e mbi të gjitha përgatitja e një plan veprimi gjatë sezonit veror janë tërësisht të munguara. Ky është një tjetër dështim i pushtetit të Sali Berishës i cili po ju kushton tepër shtrenjtë shqiptarëve. Nëse turizmi është prioritet i shtetit, atëherë masat duhet të ishin marrë kohë më parë. Dështimi i qeverisë po kushton jetë po aq sa lufta.

Nga ana tjetër është një përgjegjësi kritike e Ministrisë së Brendshme e drejtuesit të saj Z. Lulzim Basha jo vetëm të reagojnë me retorikë, por të përgatiten e të veprojnë në terren. Ndaj i bëjmë thirrje Z. Basha të dalë menjëherë në terren për të analizuar e mbikëqyrur masat që po merren për të kufizuar bilancin tragjik në rrugë, për të kursyer humbjen e jetëve të bashkëqytetarëve tanë e për të mos ia nxirë vendit imazhin siç kemi bërë deri më sot.

Gjithashtu, duam t'i bëjmë thirrje policisë së shtetit të vihet menjëherë në lëvizje për të zbardhur incidentin e pardjeshëm, ku sipas mediave të ndryshme raportohet se disa punonjës të policisë së shtetit kanë dhunuar katër qytetarë duke ju kanosur me armë. Këto veprime dëmtojnë imazhin e policisë dhe të shtetit shqiptar. Policia e shtetit është një institucion i cili ka detyrën t'i mbrojë qytetarët e jo t'i dhunojë ata. Partia Socialiste, si të gjithë shqiptarët pret të shohë menjëherë masat që Ministri i Brendshëm do të ndërmarrë për t’u përballur me këto situata