Nesër 640 mijë nxënës ulen në bankat e shkollës

Të hënën rreth 640 mijë nxënës të arsimit parauniversitar nisin vitin e ri shkollor. Janë 376 shkolla të mesme, me rreth 145 mijë nxënës, 1749 shkollat të arsimit bazë me rreth 411 mijë nxënës dhe kopshtet me 75 mijë fëmijë. Në çeljen e vitit të ri mësimor do të marrin pjesë dhe nxënësit e moshës 5-6 vjeç, të cilët do të sistemohen në klasat përgatitore që do të funksionojnë pranë secilës shkollë të arsimit të detyruar. Sipas përcaktimeve të bëra, me nisjen e vitit të ri shkollor do të hapen 100 klasa të reja përgatitore. Prej tre vitesh nxënësit po edukohen sipas strukturës arsimore 5+4+3, e ngjashme me sistemin e shumë vendeve të rajonit dhe Europës.