Faqe e parëArkivëKontaktRSS

Përfaqësuesit e KFOR-it dhe të SHPK-së kanë thënë sot se nuk është nevoja të rritin numrin e forcave të sigurisë në Kosovë, një ditë para mbajtjes së zgjedhjeve parlamentare dhe lokale serbe, bën të ditur radio Europa e Lirë.
"Dita e nesërme do të jetë një ditë e zakonshme pune", citon radioja zëdhënësin e Shërbimit Policor të Kosovës, Veton Elshani.
"Shërbimi policor nuk është i përfshirë në zgjedhjet e Serbisë. Sidoqoftë, ne e dimë që ato do të mbahen në Kosovë dhe ne do kemi një kujdes të shtuar, por kjo në kuadër të kryerjes së detyrës sonë për ruajtjen e rendit dhe qetësisë publike. Ne nuk jemi të angazhuar në asnjë formë për ruajtjen e vendvotimeve apo për diçka të tillë", tha Elshani.
Ai bëri të ditur se analizat që kanë kryer njësitet e ndryshme të policisë së UNMIK-ut dhe të SHPK-së nuk flasin për ndonjë keqësim të situatës, megjithatë pohoi se autoritetet e rendit janë në gjendje gatishmërie për çfarëdo situate.
Edhe zëdhënësi i KFOR-it, Zhan Lyk Kotard, tha se situata e sigurisë në gjithë Kosovën është e qetë dhe e qëndrueshme.
"Për ne situata e sigurisë është e qetë. Ne po bëjmë punën tonë si çdo ditë tjetër. Kjo do të bëhet edhe nesër", citohet Kotard nga Europa e Lirë.
Ndërkaq, Besim Hoti, zëdhënës i policisë për rajonin e Mitrovicës, tha se autoritet e rendit që veprojnë në veri të Kosovës "do të bëjnë vëzhgimin e situatës, ndonëse nuk presin "asgjë spektakolare".
"Policia, SHPK-ja dhe UNMIK-u nuk do të kenë ndonjë rol aktiv në këtë proces. Gjithë ajo që mund të bëjmë, është që me një profil të ulët policor, të monitorojmë situatën në përgjithësi dhe t’i kryejmë në rregull detyrat që parashikon ruajtja e rendit dhe qetësisë publike”, u shpreh Hoti.
Përfaqësues të institucioneve vendore dhe ndërkombëtare i kanë quajtur zgjedhjet serbe që do të mbahen nesër në Kosovë, si "jolegjitime" dhe "të papranueshme". Megjithatë, udhëheqës të administratës së OKB-së kanë thënë se "nuk do t'i pengojnë me forcë" këto zgjedhje.

Emri	:
E-mail	:
Komenti	:
Kodi	:	Shkruani kodin qe shihni me larte...

Shenim

  Stafi i faqes ka te drejte te fshije te gjithe
  komentet qe nuk i pershtaten temes...

• Faqe e pare
• Foto Lajm
• Kontakt
• Arkive
• Argetim